اس اہم اجلاس میں قونصل جنرل شکاگو طارق کریم بھی شریک ہوئے۔ تقریب میں پاکستانی نژاد امریکی کاروباری شخصیات کے ساتھ ساتھ ٹیکسٹائل، ٹیکنالوجی، توانائی، صحت اور وینچر کیپیٹل سمیت مختلف صنعتوں کے نمائندے بڑی تعداد میں موجود تھے۔

سفیر پاکستان رضوان سعید شیخ نے شرکاء سے خطاب میں کہا کہ امریکا پاکستان کی سب سے بڑی برآمدی منڈی ہے اور حکومت پاکستان دوطرفہ تجارت کے فروغ کے لیے پرعزم ہے۔ انہوں نے کہا کہ آئندہ برسوں میں پاک امریکا معاشی تعلقات کو نئی بلندیوں تک لے جانا ہماری ترجیح ہے تاکہ دونوں ملکوں کے عوام کو برابر فائدہ پہنچ سکے۔سفیر نے پاکستان میں سرمایہ کاری کے مواقع پر روشنی ڈالتے ہوئے بتایا کہ ملک کا سرمایہ کاری ماحول تیزی سے ترقی کر رہا ہے، جہاں مسابقتی مراعات، ہنر مند نوجوان افرادی قوت اور بنیادی ڈھانچے کی بہتری نمایاں عوامل ہیں۔

سفیر نے پاکستان کی جغرافیائی اہمیت اجاگر کرتے ہوئے کہا کہ پاکستان جنوبی ایشیا، وسطی ایشیا اور مشرقِ وسطیٰ کو جوڑنے والا قدرتی تجارتی مرکز ہے۔ انہوں نے شرکاء کو اسپیشل انویسٹمنٹ فسیلیٹیشن کونسل (SIFC) کے بارے میں بتایا جو غیر ملکی سرمایہ کاروں کو ایک کھڑکی سے سہولت فراہم کرنے اور پالیسیوں کے تسلسل کو یقینی بنانے کے لیے قائم کی گئی ہے۔

انہوں نے امریکی کاروباری شخصیات کو آئی ٹی، زراعت، توانائی، صحت، معدنیات اور دیگر شعبوں میں سرمایہ کاری کے وسیع مواقع سے فائدہ اٹھانے کی دعوت دی۔ سفیر نے یقین دلایا کہ واشنگٹن میں پاکستانی سفارت خانہ اور شکاگو قونصل خانہ امریکی سرمایہ کاروں اور تاجروں کے لیے ہر ممکن معاونت فراہم کرنے کے لیے ہمہ وقت تیار ہیں۔

چیمبر کے صدر نوید انور اور ڈاکٹر طارق بٹ نے شرکاء کو تنظیم کے قیام، وژن اور مقاصد پر بریفنگ دی۔ انہوں نے کہا کہ PACCC رواں سال اپریل میں قونصل جنرل کی مشاورت سے قائم کی گئی تھی جس کا بنیادی مقصد پاکستان اور امریکا کے درمیان اقتصادی تعاون اور ڈائسپورا کی کاروباری سرگرمیوں کو فروغ دینا ہے۔شرکاء نے امریکی مارکیٹ تک رسائی بڑھانے، پاکستانی صنعت کے ساتھ روابط مستحکم کرنے اور دونوں ملکوں کے درمیان ادارہ جاتی تعاون کے طریقہ کار پر گفتگو کی۔

قونصل جنرل طارق کریم نے PACCC کی قیادت کو اس کے وژن کو حقیقت میں ڈھالنے پر مبارکباد دی اور دونوں ملکوں کی کاروباری برادری کو جوڑنے کی کوششوں کو سراہا۔ انہوں نے کہا کہ امریکی مڈویسٹ خطے میں پاکستان کی تجارتی اور سرمایہ کاری سرگرمیاں تیزی سے بڑھ رہی ہیں اور قونصل خانہ ڈائسپورا انٹرپرینیورز کے لیے ہرممکن تعاون فراہم کرتا رہے گا۔

PACCC کے اراکین نے یقین دہانی کرائی کہ مستقبل میں تجارتی وفود، سرمایہ کاری فورمز اور بزنس پروموشن پروگرام منعقد کیے جائیں گے تاکہ دوطرفہ معاشی تعلقات مزید وسعت اختیار کریں۔ انہوں نے پاکستانی سفیر کو یقین دلایا کہ مشترکہ مقاصد کے حصول کے لیے وہ مکمل تعاون فراہم کریں گے۔یہ اجلاس اس امر کا مظہر تھا کہ پاکستان اور امریکا کے درمیان تجارتی و سرمایہ کاری روابط نہ صرف مسلسل بڑھ رہے ہیں بلکہ ڈائسپورا برادری ان تعلقات کو مزید فروغ دینے میں بھرپور کردار ادا کر رہی ہے۔