ishtiaq ahmed 
اردو ورلڈ کینیڈا ( ویب نیوز )روس کے قونصل جنرل آندرے وکٹرووچ فیڈروف نے پی ٹی آئی حکومت کے روس کے ساتھ تیل کی خریداری کے معاہدے سے لاعلمی کا اظہار کیا ہے۔
ایک اخبار کو انٹرویو دیتے ہوئے روسی قونصل جنرل نے روس اور پاکستان کے تجارتی تعلقات سمیت روس یوکرین تنازع پر بھی بات کی۔
قونصل جنرل نے کہا کہ پاکستان اور روس کے دوستانہ تعلقات ہیں، ہم پاکستان کو دوست ملک سمجھتے ہیں اور ہم یہ توقع بھی رکھتے ہیں کہ پاکستان روس کو دوست ملک سمجھے گا۔
اپنے انٹرویو میں روسی قونصل جنرل نے پاکستان کے ساتھ تجارتی اور اقتصادی تعاون قائم کرنے کی خواہش کا بھی اظہار کیا۔
انہوں نے کہا کہ دونوں ممالک تیل، گیس، زراعت، طبی اور جراحی جیسے مختلف شعبوں سے بھی فائدہ اٹھا سکتے ہیں لیکن مغرب کی طرف سے دونوں ممالک پر عائد غیر قانونی پابندیاں تجارتی عمل کو متاثر کر رہی ہیں اور رقم کی منتقلی نہیں ہو رہی ہے۔ دونوں ممالک کو اس مسئلے کے حل کے لیے مل کر کام کرنا چاہیے۔
قونصل جنرل نے سابق وزیراعظم عمران خان کے دورہ روس کے دوران زیر غور امور پر بھی تبادلہ خیال کیا تاہم انہوں نے پاکستان کے ساتھ تیل کی خریداری کے معاہدے کی تفصیلات یا روس کے ساتھ پاکستانی وزرا کے تجارتی رابطوں کی تفصیلات نہیں بتائیں۔
انہوں نے کہا کہ یہ مسائل ابھی زیر غور ہیں۔ روسی قونصل جنرل نے کہا کہ روس اور یوکرین کے درمیان تنازع کے حل میں مغربی ممالک سب سے بڑی رکاوٹ ہیں۔
