اردو ورلڈ کینیڈا ( ویب نیوز )اسلام آباد ہائی کورٹ نے چیئرمین پی ٹی آئی کے خلاف توشہ خانہ فوجداری کیس کی کارروائی روکنے کے حکم میں توسیع کردی۔
اسلام آباد ہائی کورٹ میں چیئرمین پی ٹی آئی کے خلاف توشہ خانہ فوجداری کیس کی سماعت ہوئی جس میں سابق وزیراعظم کے وکیل خواجہ حارث عدالت میں پیش ہوئے اور الیکشن کمیشن کی جانب سے امجد پرویز پیش ہوئے۔

سابق وزیراعظم نے توشہ خانہ کیس میں ٹرائل کورٹ کی کارروائی کے خلاف درخواست دائر کردی۔
سماعت کے دوران خواجہ حارث نے کیس کی سماعت آئندہ ہفتے تک ملتوی کرنے کی استدعا کی جس پر الیکشن کمیشن کے وکیل نے کہا کہ عدالت نے ٹرائل کورٹ کی کارروائی روک دی ہے۔ پابندی کا حکم واپس لیں۔
الیکشن کمیشن کے وکیل نے ٹرائل کورٹ کو کارروائی سے روکنے کا حکم واپس لینے کی استدعا کرتے ہوئے کہا کہ عدالت سٹے ختم کرکے ٹرائل کورٹ کو حتمی فیصلہ جاری کرنے سے روک سکتی ہے، اس لیے عدالت سے استدعا ہے کہ حکم امتناعی ختم کیا جائے۔
بعد ازاں عدالت نے چیئرمین پی ٹی آئی کے خلاف توشہ خانہ فوجداری کیس کی کارروائی روکنے کے حکم میں 14 جون تک توسیع کردی۔