غیر ملکی میڈیا کے مطابق کشتیوں کو حادثہ 10 اور 11 ستمبر کو ایکویٹور صوبے سے 150 کلومیٹر دور پیش آیا جس کے نتیجے میں 193 افراد کی ہلاکت کی تصدیق ہوئی ہے جب کہ 150 سے زائد افراد تاحال لاپتہ ہیں جن کی تلاش جاری ہے۔

رپورٹ کے مطابق 11 ستمبر کو کولیلا کے علاقے میں دریائے کانگو کے کنارے 500 افراد سے بھری کشتی میں آگ لگ گئی جس کے باعث کشتی الٹ گئی۔

جمہوریہ کانگو کی انسانی امور کی وزارت کا کہنا ہے کہ کشتی الٹنے کے بعد ڈوبنے والوں میں 107 افراد ہلاک ہوئے جب کہ 200 سے زائد افراد کو بچا لیا گیا اور تقریباً 150 افراد تاحال لاپتہ ہیں جن کی تلاش جاری ہے۔غیر ملکی میڈیا کے مطابق اس سے قبل 10 ستمبر کو ایکویٹور صوبے کے علاقے باسینکسو میں موٹر سے چلنے والی کشتی الٹنے سے کم از کم 86 افراد ہلاک ہو گئے تھے، جن میں زیادہ تر طلباء تھے۔رپورٹ کے مطابق بسینکوسو میں موٹرائزڈ کشتی الٹنے کے حادثے کی وجوہات تاحال سامنے نہیں آسکیں جب کہ اس حادثے میں متعدد افراد لاپتہ ہوگئے جن کی تلاش جاری ہے۔