اردو ورلڈ کینیڈا ( ویب نیوز )سری لنکا میں پیٹرول کی شدید قلت کے باعث پارلیمنٹ کا اجلاس بھی منسوخ ہوگیا ہے
خبررسا ں ایجنسی کے مطابق حکام نے جمعرات کو بتایا کہ ایک تباہ کن معاشی بحران ملک کی پہلے سے کم پٹرول کی سپلائی کو تیزی سے ختم کر رہا ہے
اس کے علاوہ غیر ملکی کرنسی کی قلت نے خوراک، تیل اور ادویات کی درآمدات کو روک دیا ہے جبکہ مہنگائی نے سری لنکا کے 22 ملین لوگوں کی زندگی اجیرن کر دی ہے۔
اطلاعات کے مطابق پارلیمانی حکام نے کہا ہے کہ اسکولوں اور کچھ ریاستی دفاتر کی بندش کے چند دنوں بعد ہم نے پیٹرول کے غیر ضروری استعمال سے بچنے کے لیے پارلیمانی اجلاس کو منسوخ کرنے کا فیصلہ کیا ہے۔
سری لنکا کے وزیر توانائی نے کہا ہے کہ جمعرات کو پیٹرول کی کھیپ پہنچنے میں تاخیر ہوئی اس لیے ڈرائیوروں کو سفر کم کرنے کی تاکید کی گئی۔
انہوں نے کہا کہ آج اور کل پمپنگ اسٹیشنوں پر محدود مقدار میں پیٹرول تقسیم کیا جائے گا۔
