اردو ورلڈ کینیڈا ( ویب نیوز )قومی سلامتی کمیٹی کا ان کیمرہ اجلاس قومی اسمبلی ہال میں طلب کیا گیا جس میں آرمی چیف جنرل قمر جاوید باجوہ، ڈی جی آئی ایس آئی لیفٹیننٹ جنرل ندیم احمد انجم قومی سلامتی کے امور پر بریفنگ دیں گے۔
دوسری جانب قومی اسمبلی کے اجلاس کے دوران حکومت نے ایک بار پھر تحریک انصاف کو ایوان کی کارروائی میں حصہ لینے کی دعوت دی ہے۔ قومی اسمبلی کے اجلاس میں حکومت نے الیکشن اور احتساب ترمیمی بل پر دستخط نہ کرنے پر صدر کی مذمت کرتے ہوئے کہا کہ یہ ملک عمران خان کی مرضی کے مطابق نہیں چلے گا۔
وفاقی وزیر ایاز صادق نے کہا کہ صدر نے الیکشن اور نیب رولز پر دستخط نہ کرکے ثابت کردیا کہ وہ پی ٹی آئی کے رکن ہیں
قومی اسمبلی کا اجلاس سپیکر راجہ پرویز اشرف کی زیر صدارت ہوا۔ اجلاس سے خطاب کرتے ہوئے وفاقی وزیر برائے اقتصادی امور سردار ایاز صادق نے کہا کہ صدر عارف علوی کا طریقہ کار درست نہیں، وہ اس طرح پاکستان کے آئین سے کھیلنے کی کوشش نہ کریں، عمران خان ہاتھ میں پستول رکھ کر الیکشن نہیں کروا سکتے۔ . ہم پہلے کی طرح انہیں دعوت دیتے ہیں، بہت گالیاں دیں، اب ایوان میں بیٹھتے ہیں۔ قومی اسمبلی کا اجلاس منگل کی دوپہر ڈیڑھ بجے تک ملتوی کر دیا گیا۔
