حکام کے مطابق یہ افسوسناک حادثہ طیارے کے برقی نظام میں اچانک خرابی کے باعث پیش آیا۔ترکیہ کے صدارتی شعبۂ مواصلات کے سربراہ برہان الدین دوران نے تصدیق کی ہے کہ حادثے سے قبل طیارے کے عملے نے ایئر ٹریفک کنٹرول ٹاور کو برقی خرابی کے باعث پیدا ہونے والی ہنگامی صورتحال سے آگاہ کیا تھا۔ عملے نے انقرہ کے ایسن بوغا ایئرپورٹ پر فوری ہنگامی لینڈنگ کی اجازت طلب کی تھی۔برہان الدین دوران نے سوشل میڈیا پلیٹ فارم ایکس (سابقہ ٹوئٹر) پر بتایا کہ پائلٹ نے طیارے کو واپس انقرہ کی جانب موڑنے کا فیصلہ کیا، تاہم واپسی کے دوران طیارے سے اچانک رابطہ منقطع ہو گیا اور کچھ ہی دیر بعد طیارہ ریڈار سے غائب ہو گیا۔طیاروں کی نگرانی کرنے والی بین الاقوامی ویب سائٹ فلائٹ ریڈار کے مطابق پرواز نے ابتدا میں معمول کے مطابق بلندی حاصل کی، مگر اچانک طیارے کی اونچائی میں تیزی سے کمی واقع ہوئی اور پرواز کے صرف 16 منٹ بعد طیارہ ریڈار اسکرین سے غائب ہو گیا۔

ترک میڈیا نے رپورٹ کیا ہے کہ جس علاقے میں طیارہ لاپتا ہوا وہاں زور دار دھماکے کی آواز بھی سنی گئی، جس کے بعد فوری طور پر ریسکیو اور سرچ آپریشن شروع کر دیا گیا۔ بعد ازاں طیارے کے ملبے تک رسائی حاصل کر لی گئی۔ترک وزیر انصاف یلماز طنج نے تصدیق کی ہے کہ انقرہ کے پراسیکیوٹر جنرل آفس نے حادثے کی وجوہات جاننے کے لیے باقاعدہ تحقیقات کا آغاز کر دیا ہے۔ حادثے کے تمام پہلوؤں کا جائزہ لیا جا رہا ہے، جن میں تکنیکی خرابی اور دیگر ممکنہ عوامل شامل ہیں۔

دوسری جانب لیبیا کی عبوری حکومت کے سربراہ عبد الحمید الدبیبہ نے جنرل محمد احمد الحداد کی وفات کی تصدیق کرتے ہوئے گہرے دکھ اور افسوس کا اظہار کیا۔ انہوں نے بتایا کہ حادثے میں دیگر اعلیٰ فوجی اور سرکاری حکام بھی جاں بحق ہوئے ہیں۔جاں بحق ہونے والوں میں لیفٹیننٹ جنرل الفیتوری غریبیل، بریگیڈیئر محمود القطيوی، محمد العصاوی دیاب اور میڈیا آفس کے فوٹوگرافر محمد عمر احمد محجوب شامل ہیں۔

لیبیا کی وزارت دفاع کے مطابق ایک اعلیٰ سطحی وفد بدھ کے روز انقرہ پہنچے گا جو ترک حکام کے ساتھ مل کر حادثے کی تفصیلات اور تحقیقات کا جائزہ لے گا۔یہ حادثہ لیبیا اور ترکیہ دونوں کے لیے ایک بڑا سانحہ قرار دیا جا رہا ہے، جبکہ دونوں ممالک کی قیادت کی جانب سے جاں بحق افراد کے اہل خانہ سے تعزیت کا اظہار کیا گیا ہے۔