: منی لانڈرنگ کیس کی سماعت کے سلسلے میں وزیراعظم شہباز شریف اور وزیراعلیٰ پنجاب حمزہ شہباز عدالت میں پیش ہوئے۔
لاہور کی خصوصی عدالت سنٹرل میں شہباز شریف اور حمزہ شہباز کے خلاف منی لانڈرنگ کیس کی سماعت ہوئی جس میں دونوں شخصیات عدالت میں پیش ہوئیں۔
اس موقع پر سکیورٹی کے سخت انتظامات کیے گئے تھے اور عام سائلین کو عدالت کے احاطے سے نکال دیا گیا تھا۔
وزیر اعلیٰ پنجاب حمزہ شہباز کے وکیل امجد پرویز عبوری ضمانت کی توثیق کے لیے دلائل دئیے
امجد پرویز نے اپنے دلائل میں کہا کہ ڈیڑھ سال تک تحقیقات ہوئیں، ایف آئی اے کوئی ثبوت ریکارڈ پر نہیں لاسکی، حالیہ دنوں میں بدترین پولیٹیکل انجینئرنگ کی گئی، لاہور ہائیکورٹ نے بھی پولیٹیکل انجینئرنگ کو حقیقت قرار دیا ہے۔ جیل میں رہتے ہوئے ایف آئی اے نے دونوں سے پوچھ گچھ کی۔ ماضی میں اپوزیشن لیڈروں کو دبانے کے لیے حکومتی مشینری کا استعمال کیا جاتا تھا۔
دوران سماعت جج نے استفسار کیا کہ کیا ایف آئی اے شہباز شریف اور حمزہ شہباز کی گرفتاری چاہتی ہے؟ جس پر ایف آئی اے کے وکیل نے کہا کہ دونوں ملزمان کی گرفتاری ضروری ہے کیونکہ دونوں ملزمان تفتیش میں شامل نہیں تھے۔
