وزیراعظم شہباز شریف نے کہا ہے کہ عالمی سطح پر مہنگائی بڑھنے سے ملک میں تیل اور گیس کی قیمتوں میں اضافہ کیا گیا ہے۔
ترک ٹی وی چینل کو انٹرویو دیتے ہوئے وزیر اعظم شہباز شریف کا کہنا تھا کہ ملک میں تیل اور گیس کی قیمتوں میں اضافہ عالمی مہنگائی میں اضافے کے باعث ہوا۔ ہم خط غربت سے نیچے کی آبادی کو سبسڈی دے رہے ہیں۔
وزیراعظم نے مزید کہا کہ عام انتخابات مقررہ وقت پر ہوں گے یعنی 15 ماہ بعد۔ آئینی اور قانونی طور پر حکومت بدل چکی ہے۔ عام انتخابات اگست یا ستمبر 2023 میں ہوں گے۔
انہوں نے کہا کہ حکومت نے مشکل حالات اور چیلنجز کا مقابلہ کرنے کا فیصلہ کیا ہے۔ مسائل کے حل کے لیے وسائل پیدا کیے جائیں گے اور اس کے لیے دوست ممالک سے مدد لی جائے گی۔ غربت میں کمی کے لیے ملک میں تعمیر نو کی جائے گی۔
وزیراعظم نے کہا کہ ہم اپنے اہداف کے حصول کے لیے قلیل مدتی اقدامات کریں گے اور اگر ہم اقتدار میں واپس آئے تو ترقی، خوشحالی اور امن کے ایجنڈے پر پوری قوت سے کام کریں گے۔
