اردوورلڈکینیڈا( ویب نیوز)خیبرپختونخوا کے مختلف اضلاع میں سکیورٹی فورسز نے خفیہ اطلاعات کی بنیاد پر دو الگ الگ کامیاب کارروائیاں کرتے ہوئے بھارتی حمایت یافتہ 11 خوارج کو ہلاک کر دیا۔ ان کارروائیوں کے نتیجے میں دہشت گردی کے نیٹ ورک کو شدید نقصان پہنچا ہے اور علاقے میں امن و امان کے قیام کی کوششوں کو تقویت ملی ہے۔
پاک فوج کے شعبہ تعلقات عامہ (آئی ایس پی آر) کے مطابق پہلی کارروائی شمالی وزیرستان کے ایک ضلع میں عمل میں لائی گئی، جہاں خوارج کی موجودگی کی مصدقہ اطلاع پر انٹیلی جنس بیسڈ آپریشن کیا گیا۔ کارروائی کے دوران سکیورٹی فورسز نے خوارج کے ٹھکانے کو مؤثر طریقے سے نشانہ بنایا۔ شدید فائرنگ کے تبادلے کے بعد 6 خوارج کو ہلاک کر دیا گیا، جبکہ ان کے قبضے سے اسلحہ اور گولہ بارود بھی برآمد ہوا۔
دوسری کارروائی ضلع کرم میں کی گئی، جہاں پولیس اور سکیورٹی فورسز نے مشترکہ طور پر انٹیلی جنس بنیادوں پر آپریشن انجام دیا۔ فائرنگ کے تبادلے کے دوران مزید 5 خوارج مارے گئے۔ آئی ایس پی آر کے مطابق یہ عناصر سکیورٹی فورسز، قانون نافذ کرنے والے اداروں اور بے گناہ شہریوں کے خلاف دہشت گرد کارروائیوں اور ٹارگٹ کلنگ میں ملوث تھے۔
فوجی ترجمان نے بتایا کہ ہلاک ہونے والے تمام خوارج غیر ملکی، بالخصوص بھارتی سرپرستی کے تحت دہشت گرد سرگرمیاں انجام دے رہے تھے۔ علاقے میں کسی بھی دوسرے ممکنہ خارجی کے خاتمے کے لیے سرچ اور کلیئرنس آپریشن بدستور جاری ہیں تاکہ خطے کو مکمل طور پر دہشت گردوں سے پاک کیا جا سکے۔
بیان میں مزید کہا گیا کہ وفاقی ایپکس کمیٹی کی جانب سے نیشنل ایکشن پلان کے تحت منظور شدہ وژن عزمِ استحکام کے مطابق پاکستان کی سکیورٹی فورسز اور قانون نافذ کرنے والے ادارے دہشت گردی کے خلاف اپنی کارروائیاں پوری شدت کے ساتھ جاری رکھیں گے، تاکہ ملک سے غیر ملکی حمایت یافتہ دہشت گردی کا مکمل خاتمہ کیا جا سکے۔
صدر مملکت آصف علی زرداری نے شمالی وزیرستان اور کرم میں کامیاب کارروائیوں پر سکیورٹی فورسز کی پیشہ ورانہ صلاحیتوں کو سراہتے ہوئے کہا کہ فتنہ الخوارج کے مکمل خاتمے تک یہ جدوجہد جاری رہے گی۔
وزیراعظم شہباز شریف نے بھی فورسز کو خراجِ تحسین پیش کرتے ہوئے کہا کہ دہشت گردی کے ناسور کے مکمل خاتمے تک اس کے خلاف جنگ جاری رکھی جائے گی۔ انہوں نے کہا کہ بہادر اور فرض شناس افسران و جوانوں کی موجودگی میں دشمن پاکستان کی طرف میلی آنکھ سے دیکھنے کی جرات نہیں کر سکتا۔
