اردو ورلڈ کینیڈا ( ویب نیو ز ) مقبوضہ کشمیر کے سابق وزیر اعلی اور جموں و کشمیر نیشنل کانفرنس کے سربراہ فاروق عبداللہ قاتلانہ حملے میں با ل بال بچ گئے
بھارتی میڈیا رپورٹس کے مطابق واقعہ اس وقت پیش آیا جب ڈاکٹر فاروق عبداللہ ایک نجی تقریب میں شرکت کے لیے موجود تھے۔ تقریب کے دوران ایک مشتبہ شخص نے اچانک ان کے قریب آ کر پستول سے فائر کرنے کی کوشش کی۔ تاہم موقع پر موجود سکیورٹی اہلکار نے فوری ردعمل دیتے ہوئے ملزم کو قابو کر لیا اور فائرنگ ہونے سے پہلے ہی اسے روک دیا، جس کے باعث ایک ممکنہ بڑا سانحہ ٹل گیا۔
سکیورٹی ذرائع کے مطابق ملزم کو فوری طور پر گرفتار کر کے تفتیش کے لیے نامعلوم مقام پر منتقل کر دیا گیا ہے۔ ابتدائی اطلاعات کے مطابق واقعے میں کسی بھی شخص کے زخمی ہونے کی اطلاع نہیں ملی جبکہ حکام نے ملزم کی شناخت بھی تاحال ظاہر نہیں کی۔واقعے کے بعد سکیورٹی اداروں نے علاقے کو گھیرے میں لے کر مزید تفتیش شروع کر دی ہے اور یہ معلوم کرنے کی کوشش کی جا رہی ہے کہ آیا ملزم نے یہ کارروائی اکیلے کی یا اس کے پیچھے کوئی منظم منصوبہ تھا۔
دوسری جانب مقبوضہ جموں و کشمیر کے موجودہ وزیراعلیٰ اور فاروق عبداللہ کے صاحبزادے Omar Abdullah نے اپنے والد کی جان محفوظ رہنے پر اللہ کا شکر ادا کیا۔ انہوں نے کہا کہ بروقت کارروائی کرنے والے سکیورٹی اہلکاروں کی وجہ سے ایک بڑا سانحہ ٹل گیا۔
سیاسی و سماجی حلقوں کی جانب سے اس واقعے پر تشویش کا اظہار کیا جا رہا ہے جبکہ سکیورٹی اداروں نے ڈاکٹر فاروق عبداللہ کی حفاظت مزید سخت کرنے کا فیصلہ کیا ہے۔ مبصرین کے مطابق اس واقعے کے بعد مقبوضہ کشمیر میں سیاسی شخصیات کی سکیورٹی کے حوالے سے خدشات میں اضافہ ہو گیا ہے۔
