اردوورلڈ کینیڈا( ویب نیوز)اٹک اور نوشہرو فیروز میں ٹریفک حادثات میں 16 افراد جاں بحق اور 26 زخمی ہوگئےریسکیو حکام کے مطابق میانوالی سے راولپنڈی جانے والی بس فتح جنگ انٹر چینج کے قریب الٹ گئی جس کے نتیجے میں 10 افراد جاں بحق اور 17 زخمی ہوگئے۔
حکام کا کہنا ہے کہ ٹائر پھٹنے کے باعث ڈرائیور بس پر قابو نہ رکھ سکا اور حادثہ پیش آیا۔ حادثے میں زخمیوں کو ہسپتال منتقل کر دیا گیا ہے۔
دوسری جانب نوشہروفیروز میں ٹرالر اور وین میں تصادم کے نتیجے میں 6 افراد جاں بحق ہوگئے۔
پولیس حکام کے مطابق سندھ کے شہر نوشہروفیروز میں مورو کے قریب ٹریفک حادثہ پیش آیا جس میں 6 افراد جان کی بازی ہار گئے اور 9 زخمی ہوگئے۔ لاشوں اور زخمیوں کو طبی امداد کے لیے ہسپتال منتقل کردیا گیا ہے۔
حکام کا کہنا ہے کہ تمام افراد کا تعلق ٹگرے برادری سے ہے۔ حادثے میں ملوث وین شادی کی تقریب سے واپس آرہی تھی کہ حادثہ پیش آیا۔
علاوہ ازیں بہاولپور میں قومی شاہراہ پر اعظم چوک کے قریب مسافر مزدا وین الٹ گئی جس کے نتیجے میں تین افراد زخمی ہوگئے۔
ریسکیو ذرائع کے مطابق حادثہ تیز رفتاری کے باعث ٹرن لیتے ہوئے پیش آیا۔ زخمی مسافروں کو وکٹوریہ ہسپتال منتقل کر دیا گیا ہے۔
وزیراعلیٰ پنجاب مریم نواز نے ٹریفک حادثات میں قیمتی انسانی جانوں کے ضیاع پر گہرے دکھ اور افسوس کا اظہار کیا ہے۔
مریم نواز شریف نے سوگوار خاندانوں سے ہمدردی اور تعزیت کا اظہار کرتے ہوئے زخمیوں کی جلد صحت یابی کی دعا کی اور زخمیوں کو بہترین طبی سہولیات فراہم کرنے کی ہدایت کی۔
