اردو ورلڈ کینیڈا ( ویب نیوز ) اسرائیلی فوج نے ایک بار پھر پناہ گزینوں کے اسکول پر حملہ کردیا جس کے نتیجے میں بچوں سمیت 17 فلسطینی شہید اور 60 سے زائد شدید زخمی ہوگئے۔عرب میڈیا کے مطابق اسرائیل نے غزہ شہر میں پناہ گزینوں کے اسکول پر بمباری کی۔ عینی شاہدین کا کہنا ہے کہ اسکول پر پہلے حملے کے بعد اسرائیلی فوج نے امدادی کارروائیوں کے دوران مزید بم گرائے۔اسرائیلی فوج کے مطابق اسکول کو فلسطینی گروپ حماس کے جنگجوؤں کو چھپانے اور ہتھیار بنانے کے لیے کمانڈ سینٹر کے طور پر استعمال کیا جا رہا تھا، حماس نے اس الزام کی تردید کی ہے۔
دوسری جانب اسرائیلی فوج نے حماس اور حزب اللہ کے کمانڈروں پر ٹارگٹ حملوں میں اضافہ کر دیا۔ غیر ملکی میڈیا رپورٹس کے مطابق اسرائیلی فوج کی جانب سے مقبوضہ مغربی کنارے میں 2 ڈرون حملے کیے گئے جس میں حماس کے عسکری ونگ القسام بریگیڈز کے کمانڈر سمیت 9 فلسطینی شہید ہوگئے۔ ادھر لبنان میں ایک گاڑی پر اسرائیلی فضائی حملے میں حزب اللہ کے اہم کمانڈر علی عبد علی شہید ہو گئے۔ حزب اللہ نے بھی اسرائیلی اہداف کو راکٹوں اور توپوں سے نشانہ بنایا۔ 500 سے زائد فلسطینی شہید ہو چکے ہیں۔
