اردو ورلڈ کینیڈا ( ویب نیوز ) شمالی افریقی ملک چاڈ میں صدارتی محل پر مسلح افراد کے حملے میں 18 حملہ آوروں سمیت 19 افراد ہلاک ہو گئے۔

غیر ملکی خبر رساں ادارے کے مطابق بدھ کو مسلح افراد نے دارالحکومت N’Djamena میں صدارتی محل پر حملہ کیا۔نیوز ایجنسی کے نامہ نگاروں نے N’Djamena میں فائرنگ کی آوازیں سنی اور سڑکوں پر ٹینک دیکھے گئے، جب کہ سیکیورٹی ذرائع نے بتایا کہ مسلح افراد نے صدارتی کمپلیکس پر حملہ کرنے کی کوشش کی۔چاڈ کے سیکورٹی ذرائع نے یہ بھی بتایا کہ مسلح کمانڈوز نے شام 7 بج کر 45 منٹ پر صدارتی عمارت کے اندر فائرنگ کی۔ مقامی وقت کے مطابق بدھ کی شام کو صدارتی محل میں موجود سیکیورٹی اہلکاروں نے انہیں دبوچ لیا۔چاڈ کی حکومت نے تصدیق کی ہے کہ جوابی حملے میں 18 حملہ آور اور ایک سیکیورٹی اہلکار ہلاک جب کہ متعدد زخمی ہوئے۔ حکومتی ترجمان کے مطابق 18 حملہ آور ہلاک اور 6 زخمی ہوئے جب کہ جوابی کارروائی میں ایک سیکیورٹی اہلکار ہلاک اور 3 زخمی ہوئے جن میں سے ایک کی حالت تشویشناک ہے۔چاڈ حکام کا کہنا ہے کہ مسلح افراد نے صدارتی کمپلیکس میں داخل ہونے کی کوشش کی، صورتحال قابو میں ہے، عدم استحکام کی کوشش کو ناکام بنا دیا گیا ہے۔