اردو ورلڈ کینیڈا ( ویب نیوز ) سعودی عرب میں دو الگ الگ مقدمات میں جرائم کا مرتکب ہونے پر دو قیدیوں کو سزائے موت سنا دی گئی۔
سعودی میڈیا کے مطابق قصاص قانون کے تحت جن دو مجرموں کا سر قلم کیا گیا ان میں سے ایک سعودی اور دوسرا یمنی شہری ہے۔ دونوں کو قتل کے الگ الگ مقدمات میں سزائے موت سنائی گئی تھی۔
یہ بھی پڑھیں
سعودی عرب میں دادی کو قتل کرنیوالے پوتے کا سر قلم
سعودی وزارت داخلہ کی طرف سے جاری کردہ ایک بیان میں کہا گیا ہے کہ جازان میں ایک یمنی شخص شتوی حسن محمد اولا کا سر قلم کر دیا گیا جس پر اپنے ہی ہم وطن احمد علی محمد ابراہیم کو تیز دھار چاقو سے بے دردی سے قتل کرنے کا الزام تھا۔ اسی طرح مشرقی گورنری میں علی بن عدن بن معاذ الشمری نامی سعودی شہری کو قتل کرنے والے سعودی شہری عبداللہ بن شاہج بن شبیب العتیبی کا سر قلم کر دیا گیا۔
مزید پڑھیں
سعودی عرب،رواں سال 6 مجرموں کے سر قلم
وزارت داخلہ کے مطابق ان دونوں ملزمان کو قانون تک مکمل رسائی دی گئی تھی اور جرم ثابت ہونے کے بعد ان ملزمان نے مختلف عدالتوں میں سزائے موت کے خلاف اپیلیں کی تھیں تاہم تمام عدالتوں نے سزا کو برقرار رکھا۔واضح رہے کہ سعودی عرب میں رواں سال اب تک 70 کے قریب ملزمان کو پھانسی دی جا چکی ہے جو کہ گزشتہ سال کی تعداد سے زیادہ ہے۔ بین الاقوامی اداروں نے بھی اتنی بڑی تعداد میں سزائے موت پر تنقید کی ہے۔
