پاک فوج کے شعبہ تعلقات عامہ کے مطابق افغان فوجیوں نے افغانستان سے پاکستان میں داخل ہونے والے راہگیروں پر اندھا دھند فائرنگ کی۔ زیرو لائن گیٹ پر فائرنگ سے شہید ہونے والوں میں 12 سالہ بچہ بھی شامل ہے جب کہ ایک بچہ زخمی ہوا۔
آئی ایس پی آر کے مطابق پاکستانی سکیورٹی فورسز نے انتہائی تحمل کا مظاہرہ کیا، پاکستانی سیکورٹی فورسز نے معصوم لوگوں کی موجودگی میں جوابی فائرنگ نہیں کی، فائرنگ نہ کرنے کا مقصد بھاری جانی نقصان سے بچانا تھا۔
افغان سرحدی فورسز کی بلا اشتعال فائرنگ، 6 شہری شہید، آئی ایس پی آر
پاک فوج کے شعبہ تعلقات عامہ کے مطابق شہید ہونے والے افراد کی میتیں ڈسٹرکٹ ہیڈ کوارٹر چمن منتقل کردی گئیں، زخمی بچے کو سیکورٹی فورسز نے فوری طور پر ہسپتال منتقل کردیا، جس کا علاج جاری ہے۔
آئی ایس پی آر کا کہنا ہے کہ فوجیوں کی غیر ذمہ داری سے افغان حکام کو آگاہ کر دیا گیا ہے۔ افغان حکام سے کہا گیا ہے کہ ذمہ داروں کو پاکستانی حکام کے حوالے کیا جائے۔
پاک فوج کے شعبہ تعلقات عامہ کے مطابق افغان فوجیوں سے کہا جائے گا کہ وہ ذمہ دارانہ رویہ اپنائیں اور بہتر نظم و نسق برقرار رکھیں، اقدام کا مقصد مستقبل میں ایسے واقعات سے بچنا ہے۔
آئی ایس پی آر کے مطابق پاکستان باہمی تعلقات کے فروغ کے ذریعے امن، خوشحالی اور ترقی میں شراکت داری کے لیے پرعزم ہے۔
