ریاست گجرات کے شہر راجکوٹ میں ہفتے کی شام گیمنگ زون میں آگ بھڑک اٹھی جس کے نتیجے میں 9 بچوں سمیت 27 افراد ہلاک ہوگئے۔ پولیس نے ٹی آر پی گیم زون کے اونر نتن جین سمیت 3 افراد کو گرفتار کر لیا ہے، آگ گیمنگ زون کے اندر بنائے گئے عارضی حصے میں لگی۔

رپورٹ کے مطابق متعدد افراد زخمی بھی ہیں اور ہلاکتوں میں اضافے کا خدشہ ہے۔گجرات کے وزیر اعلیٰ بھوپندر بھائی پٹیل نے متعلقہ حکام کو زخمیوں کے فوری علاج کے لیے اقدامات کرنے کی ہدایت کی، جب کہ انھوں نے مرنے والوں کو فی کس چار لاکھ روپے دینے کا اعلان بھی کیا۔ حکام نے واقعہ کی تحقیقات کے لیے سینئر آئی پی ایس افسر سباش ترویدی کی سربراہی میں ایک تحقیقاتی ٹیم تشکیل دی۔