غزہ میں فلسطینی وزارت مذہبی امور نے اسرائیل کے حملوں میں 31 مساجد کے شہید ہونے کی تصدیق کی ہے۔دوسری جانب غزہ پر اسرائیلی بمباری سے گزشتہ 24 گھنٹوں کے دوران مزید 266 فلسطینی شہید ہوگئے۔ وزارت صحت کے مطابق گزشتہ 24 گھنٹوں کے دوران شہید ہونے والے فلسطینیوں میں 117 بچے بھی شامل ہیں۔غزہ میں اسرائیلی حملوں میں شہید ہونے والے فلسطینیوں کی کل تعداد 4 ہزار 651 ہوگئی، شہید ہونے والوں میں 40 فیصد بچے ہیں۔
یہ بھی پڑھیں
اسرائیلی بمباری سے شہید فلسطینیوں کی تعداد چارہزار سے بڑھ گئی
اسرائیلی حملوں سے غزہ میں 14 ہزار 245 سے زائد فلسطینی زخمی ہوئے ہیں، غزہ میں زخمی ہونے والے فلسطینیوں میں 70 فیصد بچے اور خواتین ہیں۔اسرائیل نے غزہ میں حملے تیز کرنے کا اعلان کرتے ہوئے ایک بار پھر فلسطینیوں کو غزہ کا شمالی علاقہ خالی کرکے جنوب میں جانے کی دھمکی دی ہے۔
اسرائیلی فوج کے ترجمان نے پریس کانفرنس میں کہا کہ اسرائیل حماس پر دباؤ بڑھانے کے لیے غزہ میں اپنے حملے تیز کرے گا۔فوجی ترجمان ایڈمرل کا کہنا تھا کہ ہمیں جنگ کے اگلے مرحلے میں داخل ہونا ہے اور اس کے لیے ہم کسی کے بتائے ہوئے راستے پر نہیں چلیں گے۔اسی دوران امدادی ٹرکوں کا دوسرا قافلہ رفح کراسنگ سے غزہ میں داخل ہوا۔ کل امدادی سامان کے صرف 20 ٹرک جنوبی غزہ کی پٹی پہنچے۔کیتھولک عیسائیوں کے روحانی پیشوا پوپ فرانسس نے ایک بار پھر اسرائیل فلسطین کشیدگی پر افسوس کا اظہار کیا ہے۔
