اردوورلڈکینیڈا( ویب نیوز)پاک فوج کے شعبہ تعلقات عامہ (آئی ایس پی آر) کے مطابق، 13 اور 14 ستمبر کو خیبر پختونخوا میں سکیورٹی فورسز نے دو الگ الگ انٹیلی جنس بیسڈ آپریشنز میں بھارت نواز دہشت گرد گروہ "فتنہ الخوارج” کے 31 دہشت گردوں کو ہلاک کر دیا۔

ترجمان کے مطابق ضلع لکی مروت میں دہشت گردوں کی موجودگی کی اطلاع پر کارروائی کی گئی۔ سکیورٹی فورسز نے دہشت گردوں کے ٹھکانے کو گھیرے میں لیا اور شدید فائرنگ کے تبادلے کے بعد 14 دہشت گردوں کو ہلاک کر دیا۔

اسی طرح ایک اور آپریشن ضلع بنوں میں کیا گیا، جہاں مزید 17 دہشت گرد مارے گئے۔آئی ایس پی آر نے بتایا کہ دونوں کارروائیوں کے بعد علاقے میں سرچ اور کلیئرنس آپریشن جاری ہے تاکہ کسی بھی باقی ماندہ دہشت گردوں کو بھی پکڑا یا ختم کیا جا سکے۔ ترجمان کا کہنا تھا کہ سکیورٹی فورسز بھارتی سرپرستی میں ہونے والی دہشت گردی کو جڑ سے ختم کرنے کے لیے پرعزم ہیں اور امن و امان کے قیام تک آپریشنز جاری رہیں گے۔