اردوورلڈ کینیڈا ( ویب نیوز)حماس کے ساتھ عارضی جنگ بندی ختم ہونے کے بعد اسرائیل نے ایک بار پھر غزہ پر وحشیانہ حملے شروع کر د ئیے جس کے نتیجے میں 2 بچوں سمیت 32 فلسطینی شہید ہو گئے۔
فلسطینی وزارت صحت کے بیان میں کہا گیا ہے کہ جنگ بندی میں توسیع کے ختم ہوتے ہی اسرائیلی فضائیہ کے طیاروں نے غزہ کا رخ کیا اور وحشیانہ بمباری کی جس میں اب تک 32 فلسطینی شہید ہوچکے ہیں۔
فلسطینی میڈیا کے مطابق اسرائیلی فوج غزہ کے مغربی علاقے پر بمباری کر رہی ہے۔ اسرائیلی فوج نے شمالی غزہ کے علاقے جبالیہ میں ایک مکان کو نشانہ بنایا۔
غیر ملکی خبر رساں ادارے کے مطابق اسرائیل نے حماس پر جنگ بندی معاہدے کی خلاف ورزی کا الزام عائد کرتے ہوئے غزہ پر حملے دوبارہ شروع کرنے کا اعلان کیا۔
اسرائیل اور حماس کے درمیان 24 نومبر کو قطر اور مصر کی ثالثی میں غزہ میں عارضی جنگ بندی کا معاہدہ طے پایا تھا۔ ایک ہفتے کی عارضی جنگ بندی کے دوران حماس نے 100 سے زائد قیدیوں کو رہا کیا جب کہ اسرائیل نے 240 فلسطینیوں کو رہا کیا۔
7 اکتوبر سے اب تک غزہ پر اسرائیلی حملوں میں 15 ہزار سے زائد فلسطینی شہید ہو چکے ہیں۔ امریکا نے اعلان کیا ہے کہ وہ غزہ پر اسرائیل کے حملوں کی مکمل حمایت جاری رکھے گا۔