Imran 
اردو ورلڈ کینیڈا ( ویب نیوز ) یمن کے ساحل پر کشتی ڈوبنے سے افریقہ سے غیر قانونی طور پر آنے والے 38 تارکین وطن ہلاک اور 100 لاپتہ ہو گئے۔غیر ملکی خبر رساں ادارے کے مطابق یمنی حکام کا کہنا ہے کہ تارکین وطن کی کشتی عدن کے مشرق میں واقع شبوا گورنری کے ساحل پر پہنچنے سے قبل ضلع رودام میں ڈوب گئی جس کے نتیجے میں 38 افراد ہلاک ہوگئے۔
رپورٹ کے مطابق ماہی گیروں اور مقامی باشندوں نے 78 تارکین وطن کو بچانے میں کامیابی حاصل کی تاہم 100 کے قریب افراد اب بھی لاپتہ ہیں اور امدادی کارروائیاں جاری ہیں۔برطانوی نشریاتی ادارے کی رپورٹ کے مطابق کشتی میں زندہ بچ جانے والوں نے امدادی کارکنوں کو بتایا کہ کشتی میں 250 کے قریب افراد سوار تھے، کشتی تیز ہواؤں کے باعث ڈوب گئی۔عدن کے مشرق میں روڈم ضلع کے مقامی حکام نے بتایا کہ جہاز میں سوار لوگ تارکین وطن تھے، جن میں زیادہ تر ایتھوپیا سے تھے جو خلیجی ریاستوں تک پہنچنے کے لیے یمن کو ٹرانزٹ پوائنٹ کے طور پر استعمال کرتے ہیں۔
