اردو ورلڈ کینیڈا ( ویب نیوز )اتوار کی رات لکی مروت میں کاؤنٹر ٹیررازم ڈیپارٹمنٹ (سی ٹی ڈی) اور پولیس اہلکاروں کی مشترکہ کارروائی کے دوران کالعدم تنظیم کے کم از کم چار دہشت گرد مارے گئے۔
تفصیلات کے مطابق سی ٹی ڈی اور پولیس اہلکاروں نے لکی مروت میں تھانہ نورنگ کی حدود میں تختی خیل کے علاقے میں خفیہ اطلاع پر کارروائی (آئی بی او) کی جس کے دوران علاقے میں چھپے دہشت گردوں نے فائرنگ کردی۔
قانون نافذ کرنے والے اداروں کے اہلکاروں نے جوابی فائرنگ کی جس کے نتیجے میں چار دہشت گرد مارے گئے۔ سی ٹی ڈی ترجمان نے بتایا کہ ہلاک دہشت گردوں سے خودکار ہتھیار برآمد ہوئے ہیں۔
ترجمان نے یہ بھی بتایا کہ ہلاک دہشت گردوں کے چند ساتھی جائے وقوعہ سے فرار ہونے میں کامیاب ہوگئے۔ قانون نافذ کرنے والے اداروں نے دیگر دہشت گردوں کی گرفتاری کے لیے علاقے میں سرچ آپریشن بھی شروع کر دیا ہے۔
