اردو ورلڈ کینیڈا ( ویب نیوز ) لسبیلہ بیلہ میں چنکی اسٹاپ کے قریب مسافر کوچ کھائی میں گرنے سے 40 افراد جاں بحق اور متعدد زخمی ہوگئے۔ ریسکیو ذرائع کے مطابق مسافر کوچ کھائی میں گرنے سے آگ لگ گئی۔ امدادی کارروائیوں کے دوران 12 افراد کی لاشیں نکال کر ہسپتال منتقل کر دی گئیں۔

پولیس کا کہنا ہے کہ مسافر کوچ کوئٹہ سے کراچی جارہی تھی کہ بیلہ میں چنکی اسٹاپ کے قریب کھائی میں جا گری اور حادثے کا شکار ہوگئی۔ اسسٹنٹ کمشنر بیلہ نے اس حوالے سے بتایا ہے کہ جائے حادثہ پر امدادی کارروائیاں مکمل کر لی گئی ہیں، اب تک 40 افراد کی لاشیں نکالی جا چکی ہیں جب کہ 4 زخمیوں کو ہسپتال منتقل کر دیا گیا ہے۔

اے سی بیلہ کا کہنا ہے کہ حادثے کا شکار ہونے والی بس سے برآمد ہونے والی بیشتر لاشیں ناقابل شناخت ہیں، لاشوں کی شناخت کے لیے ڈی این اے ٹیسٹ کرایا جائے گا۔