اردوورلڈکینیڈا ( ویب نیوز)غزہ میں حماس اور اسرائیل کے درمیان جاری لڑائی کے دوران عارضی جنگ بندی ختم ہونے کے بعد اسرائیلی فوج نے گزشتہ دو دنوں میں 400 سے زائد حملے کیے اور 250 سے زائد فلسطینیوں کو شہید کیا۔
غزہ میں رہائشی عمارتیں جارحیت کا نشانہ بن گئیں، غزہ شہر کو پانی سپلائی کرنے والی مین سپلائی لائن بھی بمباری سے متاثر ہوئی جب کہ صہیونی فورسز نے 2 روز میں غزہ میں 400 سے زائد مقامات کو نشانہ بنایا۔
خان یونس، جبالیہ کیمپ اور النصر ہسپتال کے اطراف بھی شدید بمباری کی گئی جس کے نتیجے میں دو روز میں 250 سے زائد فلسطینی شہید اور 650 زخمی ہوئے۔
غزہ کی وزارت صحت کے مطابق 7 اکتوبر سے غزہ پر اسرائیلی حملوں میں شہید ہونے والوں کی تعداد 15 ہزار 207 سے تجاوز کر گئی ہے جب کہ زخمیوں کی تعداد 40 ہزار سے تجاوز کر گئی ہے۔ 70% لوگ صرف بچے اور خواتین ہیں۔
غزہ کی وزارت صحت کے مطابق اسرائیل نے جان بوجھ کر 130 طبی سہولیات کو نشانہ بنایا جس کے باعث 20 ہسپتالوں کو سروس سے محروم کردیا گیا جب کہ غزہ میں 280 سے زائد طبی عملہ ہلاک ہو چکا ہے۔
دوسری جانب اسرائیل کی جانب سے عارضی جنگ بندی کے خاتمے کے بعد غزہ میں محصور متاثرین تک رفح کراسنگ سے بین الاقوامی انسانی امداد کی ترسیل میں ایک دن کے تعطل کے بعد بین الاقوامی دباؤ کے بعد امدادی سامان کے 50 ٹرک غزہ میں داخل ہوگئے۔
اسرائیل نے دوحہ میں موساد کی مذاکراتی ٹیم کو مذاکرات میں کوئی پیش رفت نہ ہونے کا دعویٰ کرتے ہوئے اسرائیل واپس جانے کا حکم دیا ہے۔
عرب میڈیا کی رپورٹ کے مطابق نیتن یاہو کے دفتر سے جاری بیان میں کہا گیا ہے کہ مذاکرات میں کوئی پیش رفت نہیں ہوئی اور وزیراعظم نیتن یاہو کی ہدایت پر موساد کے سربراہ ڈیوڈ بارنیا نے دوحہ میں موجود اپنی ٹیم کو اسرائیل واپس جانے کا حکم دیا۔
بیان میں کہا گیا ہے کہ حماس نے معاہدے کے اپنے حصے کو پورا نہیں کیا، جس میں تمام رہا کیے گئے بچوں اور خواتین کی فہرست حماس کو بھیجنا شامل تھا اور جسے حماس نے جاری کرنے پر رضامندی ظاہر کی تھی۔
جواب میں حماس نے اسرائیلی الزام کو مسترد کرتے ہوئے کہا کہ تمام خواتین اور بچوں کو رہا کر دیا گیا ہے، باقی یرغمال اسرائیلی فوجی ہیں یا فوج کے لیے خدمات انجام دے رہے ہیں۔
قبل ازیں ایک باخبر ذریعے نے خبر رساں ایجنسی کو بتایا تھا کہ اسرائیلی انٹیلی جنس سروس (موساد) کی ایک ٹیم ہفتے کے روز غزہ میں لڑائی میں ایک اور جنگ بندی کے بارے میں قطری ثالثوں کے ساتھ بات چیت کے لیے دوحہ گئی تھی۔
القسام بریگیڈ کی جانب سے اسرائیلی فوج پر بمباری کی گئی ہے، شمالی غزہ کے علاقے بیت حنون میں اسرائیلی گاڑیوں کو تباہ کیا گیا جب کہ متعدد اسرائیلی فوجیوں کے جہنم میں جانے کی اطلاعات ہیں۔
القسام بریگیڈ نے صیہونی افواج پر حملوں کی ویڈیو جاری کر دی۔
اس کے علاوہ حماس نے اعلان کیا ہے کہ وہ غزہ میں مکمل جنگ بندی تک کسی بھی اسرائیلی قیدی کو رہا نہیں کرے گی۔ حماس کے نائب سربراہ صالح العاروری کا کہنا ہے کہ اسرائیلی شہریوں کے ساتھ کئی فوجی بھی ہماری جیلوں میں ہیں۔ اسرائیل نے بین الاقوامی قوانین کی خلاف ورزی کی ہے۔ کسی قسم کی رعایت نہیں کریں گے۔