اردوورلڈ کینیڈا( ویب نیوز) بلوچستان کے ضلع مستونگ میں سول ہسپتال چوک پر گرلز ہائی سکول کے قریب بم دھماکا ہوا جس سے ایک پولیس اہلکار سمیت 5 افراد جاں بحق اور متعدد زخمی ہوئے ہیں۔
پولیس کے مطابق ہلاک ہونے والوں میں ایک پولیس اہلکار اور 3 بچے شامل ہیں جبکہ زخمیوں میں زیادہ تر اسکول کے بچے ہیں۔.
بعد ازاں دھماکے میں زخمی ہونے والا ایک اور شخص علاج کے دوران ہسپتال میں دم توڑ گیا جس کے بعد ہلاکتوں کی تعداد 5 ہوگئی۔.
بم دھماکے میں زخمی ہونے والوں کو ڈی ایچ کیو ہسپتال منتقل کردیا گیا ہے جبکہ دھماکے میں پولیس کی ایک موبائل بھی تباہ ہوگئی ہے
بم دھماکے میں چوک پر موجود دیگر گاڑیوں اور رکشوں کو بھی نقصان پہنچا، قریبی علاقوں میں دھماکے کی آواز سنی گئی جبکہ پولیس اور امدادی اہلکار موقع پر پہنچ گئے۔.
پولیس کا کہنا ہے کہ دھماکے میں پولیس موبائل کو نشانہ بنایا گیا تاہم دھماکے میں اسکول وین بھی متاثر ہوئی۔.
بلوچستان کے وزیر اعلیٰ میر سرفراز بگٹی نے دھماکے کی مذمت کرتے ہوئے شہید پولیس اہلکاروں اور بچوں کے اہل خانہ سے غم کا اظہار کیا ہے۔.
انہوں نے کہا کہ شہری آبادی کے مقامی لوگوں کو بھی دہشت گردوں پر نظر رکھنی ہوگی، دہشت گردی کے عفریت کا مقابلہ صرف ایک ساتھ کیا جاسکتا ہے۔.
34
