صیہونی فوج کی تازہ فضائی اور زمینی کارروائیوں میں مزید 53 فلسطینی شہید  ہو گئے۔فلسطینی وزارتِ صحت کے مطابق ان شہداء میں **13 افراد ایسے تھے جو بھوک سے نڈھال ہو کر امداد کی تلاش میں نکلے تھے** لیکن اسرائیلی بمباری کا نشانہ بن گئے۔

مسلسل بمباری اور جارحیت کے نتیجے میں غزہ میں اب تک شہید ہونے والوں کی مجموعی تعداد **66 ہزار 225** تک جا پہنچی ہے، جبکہ **1 لاکھ 68 ہزار 938** افراد زخمی ہو چکے ہیں۔

وزارتِ صحت نے بتایا کہ اسرائیلی حملوں کے باعث اسپتالوں اور طبی مراکز تک رسائی نہایت مشکل ہو چکی ہے۔ طبی عملہ اپنی جانیں خطرے میں ڈال کر مریضوں اور زخمیوں تک پہنچنے کی کوشش کر رہا ہے۔ حکام نے عالمی برادری اور انسانی حقوق کی تنظیموں سے فوری مداخلت کی اپیل کی ہے تاکہ اسپتالوں اور طبی عملے کو تحفظ فراہم کیا جا سکے۔

اسرائیلی جارحیت کے بڑھتے ہوئے خطرات کے پیشِ نظر  انٹرنیشنل کمیٹی آف ریڈ کراس (ICRC)  نے غزہ میں اپنی سرگرمیاں عارضی طور پر معطل کرنے کا اعلان کیا ہے۔ ریڈ کراس کے بیان کے مطابق تنظیم کو غزہ سٹی میں اپنے عملے کو منتقل کرنا پڑا ہے اور حالات بہتر ہونے تک آپریشنز روک دیے گئے ہیں۔اس سے قبل عالمی تنظیم **ڈاکٹرز وِدآؤٹ بارڈرز (MSF)  بھی غزہ میں کام روکنے پر مجبور ہو چکی ہے۔فلسطینی حکام نے ایک بار پھر اقوام متحدہ، انسانی حقوق کی تنظیموں اور عالمی طاقتوں سے اپیل کی ہے کہ وہ اسرائیلی جارحیت کو روکنے کے لیے فوری اقدامات کریں اور غزہ کے عوام کو تحفظ فراہم کریں۔