اردوورلڈ کینیڈا ( ویب نیوز )1965 کی جنگ کے ہیرو میجر عزیز بھٹی شہید کا 58 واں یوم شہادت آج انتہائی عقیدت و احترام سے منایا جا رہا ہے۔
بزدل دشمن کو مارنے والے میجر عزیز بھٹی 16 اگست 1928 کو ہانگ کانگ میں پیدا ہوئے۔ قیام پاکستان سے پہلے ان کا خاندان واپس آکر گجرات کے گاؤں لڈیاں میں آباد ہو گیا۔ میجر عزیز بھٹی نے 17 پنجاب رجمنٹ میں سیکنڈ لیفٹیننٹ کے طور پر کمیشن حاصل کیا۔

1965 کی جنگ میں لاہور کا محاذ بہت گرم تھا اور جب بھارت نے پاکستان کی سرزمین پر خون بہایا تو میجر عزیز بھٹی شہید کو برکی سیکٹر پر دشمن کی پیش قدمی روکنے کا حکم ملا۔ ، 6 ستمبر سے 12 ستمبر تک میجر عزیز بھٹی کی کمپنی نے دشمن پر حملوں کا سلسلہ شروع کیا۔
میجر عزیز بھٹی نے اپنی کمپنی کے ساتھ نہ صرف دشمن کو 6 دن اور راتوں تک قابو رکھا بلکہ بدترین شکست سے دوچار کیا۔ 12 ستمبر کو دشمن کے ٹینک کا گولہ میجر عزیز بھٹی کے بائیں کندھے پر لگا اور وہ شہید ہو گئے۔
بے مثال بہادری کے اعتراف میں میجر عزیز بھٹی شہید کو اعلیٰ ترین فوجی اعزاز نشان حیدر سے نوازا گیا، قوم کے اس بہادر بیٹے نے جرات و بہادری کی لازوال داستان رقم کی ہے۔