اردو ورلڈ کینیڈا ( ویب نیوز ) امریکہ کے ایک ہائی سکول کی عمارت میں لگ بھگ ڈیڑھ سال سے لگائی گئی 7000 لائٹس بند نہ ہو سکیں۔ میساچوسٹس کے مینی چاگ ریجنل ہائی اسکول میں نصب 7,000 لائٹس اگست 2021 سے مسلسل چل رہی ہیں اور کوئی بھی انہیں بند نہیں کر سکتا۔ دن ہو یا رات، اسکول کی لائٹس مسلسل جلتی رہتی ہیں اور اس کی وجہ کمپیوٹر سرور میں خرابی ہے۔
اس خرابی کے نتیجے میں سکول انتظامیہ لائٹ سسٹم کو بند نہیں کر سکی تاہم فروری 2023 میں ہزاروں ڈالر خرچ کرنے کے بعد یہ مسئلہ حل ہونے کا امکان ہے۔ سکول حکام کے مطابق اس پر ہر ماہ ہزاروں ڈالر خرچ ہو رہے ہیں۔انہوں نے کہا کہ ہم نے اس مسئلے کو حل کرنے کی پوری کوشش کی لیکن ہر بار ناکام رہے۔
دلچسپ بات یہ ہے کہ اخراجات بچانے کے لیے اسکول میں گرین لائٹ کا نظام نصب کیا گیا تھا۔ یہ سسٹم کمپیوٹر میں نصب ایک سافٹ ویئر پر چلتا ہے تاکہ دن ہو یا رات کے حساب سے عمارت کی لائٹس کو مدھم یا روشن کیا جا سکے۔ اس پروگرام کا مقصد توانائی اور پیسے کی بچت کرنا تھا، لیکن اگست 2021 تک، وہ لائٹس مسلسل اسی پاور پر چل رہی ہیں۔
حکام کے مطابق لائٹ سسٹم ڈیفالٹ پوزیشن پر چلا گیا ہے اور ہم ان لائٹس کو بند کرنے میں ناکام رہے ہیں۔ کچھ اساتذہ نے بجلی کے ضیاع کو کم کرنے کے لیے چند بلب دستی طور پر ہٹا د دئیے سسٹم کے لیے نئے سافٹ ویئر کی فروری میں اسکول میں فراہمی متوقع ہے جس کے بعد کمپیوٹر سرور کو بھی تبدیل کردیا جائے گا۔ اس پورے عمل پر 75 سے 80 ہزار ڈالر لاگت آئے گی۔
