اردو ورلڈ کینیڈا ( ویب نیوز ) کینیڈا کے شہر ٹورنٹو میں پولیس کے بڑے کرپشن اسکینڈل نے ہلچل مچا دی ہے
جہاں یارک ریجن پولیس کی تحقیقات کے بعد ٹورنٹو پولیس کے 7 حاضر سروس اور ایک ریٹائرڈ افسر کو منظم جرائم میں معاونت کے الزام میں گرفتار کر لیا گیا ہے۔ ملزمان کی عمریں 24 سے 57 سال کے درمیان بتائی جا رہی ہیں اور ان میں تجربہ کار افسران بھی شامل ہیں۔
حکام کے مطابق بعض اہلکاروں پر مجرموں کو خفیہ معلومات فراہم کرنے، رشوت لینے، منشیات کی اسمگلنگ میں ملوث ہونے اور غیر قانونی کاروبار کو تحفظ دینے جیسے سنگین الزامات عائد کیے گئے ہیں۔ ٹورنٹو پولیس چیف مائرن ڈیمکیو نے کہا ہے کہ کم از کم چار اہلکاروں کو بغیر تنخواہ معطل کرنے کی درخواست دی گئی ہے، جبکہ فورس کے اندر نگرانی اور معلومات تک رسائی کے نظام کا بھی جائزہ لیا جا رہا ہے۔ پولیس نے صوبائی انسپکٹر جنرل سے بھی معاملے کی تحقیقات کی درخواست کی ہے۔
کانسٹیبل ٹموتھی بارن ہارٹ
56 سالہ ٹموتھی بارن ہارٹ کو اس کیس کا مرکزی کردار قرار دیا جا رہا ہے۔ پولیس کا الزام ہے کہ انہوں نے مجرموں کو خفیہ معلومات فراہم کیں جس سے ٹارگٹ کلنگ جیسے جرائم میں مدد ملی۔ ان پر یہ بھی الزام ہے کہ انہوں نے رشوت لے کر غیر قانونی کینابس ڈسپنسریوں کو پولیس کارروائی سے بچایا اور کوکین اسمگلنگ میں حصہ لیا۔
مسسگا سے تعلق رکھنے والے بارن ہارٹ پر 17 مقدمات درج کیے گئے ہیں جن میں انصاف کی راہ میں رکاوٹ ڈالنے اور منشیات کی اسمگلنگ کی سازش شامل ہے۔ وہ اس وقت زیر حراست ہیں اور ان کی ضمانت کی سماعت ملتوی کر دی گئی ہے۔ بتایا جاتا ہے کہ انہیں ٹورنٹو پولیس میں تقریباً 20 سال کا تجربہ حاصل ہے۔
سارجنٹ رابرٹ بلیک
42 سالہ رابرٹ بلیک پر الزام ہے کہ انہوں نے رشوت کے بدلے غیر قانونی کینابس مراکز کو تحفظ فراہم کیا اور کوکین کی اسمگلنگ میں ملوث رہے۔ وان شہر سے تعلق رکھنے والے بلیک پر انصاف میں رکاوٹ ڈالنے کی سازش سمیت چار الزامات عائد کیے گئے ہیں۔
ریٹائرڈ کانسٹیبل جان میڈلی سینئر
55 سالہ جان میڈلی سینئر، جو اپریل 2025 میں ریٹائر ہوئے تھے، پر غیر قانونی گیمنگ اور بیٹنگ سے متعلق بھتہ خوری کے کیس میں خفیہ معلومات تک غیر قانونی رسائی اور انہیں پھیلانے کا الزام ہے۔ ان پر 11 مقدمات درج ہیں جن میں عوامی عہدے کا غلط استعمال بھی شامل ہے۔ انہیں حراست کے بعد رہا کر دیا گیا اور 20 فروری کو دوبارہ عدالت میں پیش ہونا ہوگا۔میڈلی کو ماضی میں نمایاں خدمات پر اعزازات بھی مل چکے ہیں، تاہم اپنے کیریئر کے دوران انہیں ڈسپلنری کارروائیوں کا سامنا بھی رہا۔
کانسٹیبل جان میڈلی جونیئر
29 سالہ جان میڈلی جونیئر، جو میڈلی سینئر کے بیٹے ہیں، پر بھی خفیہ معلومات تک غیر قانونی رسائی اور انہیں تقسیم کرنے کا الزام ہے۔ ان پر پولیس افسر کے طور پر اعتماد توڑنے اور کمپیوٹر کے غیر مجاز استعمال کے دو مقدمات درج ہیں۔
سارجنٹ کارل گریلیٹ
49 سالہ کارل گریلیٹ پر الزام ہے کہ انہوں نے رشوت کے بدلے غیر قانونی کینابس ڈسپنسریوں کو تحفظ فراہم کیا۔ ان پر انصاف میں رکاوٹ ڈالنے کی سازش اور عوامی اعتماد توڑنے سمیت چار الزامات عائد کیے گئے ہیں۔
سارجنٹ سوربھ جیت بیدی
38 سالہ سوربھ جیت بیدی پر بھی رشوت لینے، غیر قانونی کینابس مراکز کی پشت پناہی اور کوکین اسمگلنگ میں ملوث ہونے کے الزامات ہیں۔ ان کے خلاف چھ مقدمات درج کیے گئے ہیں جن میں منشیات کی اسمگلنگ کی سازش شامل ہے۔
حکام کا کہنا ہے کہ تحقیقات ابھی جاری ہیں اور مزید انکشافات متوقع ہیں۔ اس اسکینڈل کے بعد شہریوں کے اعتماد کو شدید دھچکا پہنچا ہے، جبکہ ٹورنٹو پولیس چیف نے یقین دہانی کرائی ہے کہ معاملے کی تہہ تک پہنچنے کیلئے “کوئی کسر نہیں چھوڑی جائے گی” اور عوام کا اعتماد بحال کرنے کیلئے سخت اقدامات کیے جائیں گے۔
