اردو ورلڈ کینیڈا ( ویب نیوز)آرمی پبلک سکول پشاور پر دہشت گردوں کے حملے کو 8 سال ہو گئے ہیں۔
16 دسمبر 2014 کو اسی دن دہشت گردوں نے پشاور کے آرمی پبلک سکول پر حملہ کر کے معصوم بچوں کو نشانہ بنایا اور 100 سے زائد طلباء کو بے دردی سے شہید کر دیا تھا ۔

شہداء کے والدین آج بھی صدمے میں ہیں، جن والدین کے بچے بچ گئے وہ وہ ہولناک دن نہیں بھول سکتے، دہشت گرد سکول پر حملہ کر کے علم کی شمع بجھانا چاہتے تھے لیکن قوم کے حوصلے پست نہیں ہوئے۔

اپنے پیاروں کو کھونے کے بعد قوم نے نئے عزم کے ساتھ دہشت گردوں سے لڑنے کا فیصلہ کیا جب کہ حکومت نے انسداد دہشت گردی کے لیے نیشنل ایکشن پلان کا بھی آغاز کیا۔ دہشت گردوں نے مستقبل کے معماروں کو نشانہ بنا کر ملک اور سیکیورٹی اداروں کی روح کو توڑنے کی کوشش کی لیکن ملک بھر میں جاری تعلیمی سرگرمیاں ملک دشمنوں کو پیغام دے رہی ہیں کہ قوم کے عزم میں کوئی تبدیلی نہیں آئی، شہداء کی قربانیاں رائیگاں نہیں جائیں گی۔