اردو ورلڈ کینیڈا ( ویب نیوز )آزاد کشمیر میں پاک فوج کی گاڑی کو حادثہ، 9 جوان شہید اور 4 زخمی ہوگئے۔

پاک فوج کے شعبہ تعلقات عامہ (آئی ایس پی آر) کے مطابق آزاد کشمیر کے علاقے باغ کے قریب پاک فوج کی گاڑی کو حادثہ پیش آیا جس میں 9 جوان شہید اور 4 زخمی ہوگئے۔

آئی ایس پی آر کے مطابق زخمیوں کو طبی امداد کے لیے سی ایم ایچ راولپنڈی منتقل کر دیا گیا ہے۔

آئی ایس پی آر کا کہنا ہے کہ شہداء کی نماز جنازہ منگلا چھاؤنی میں ادا کر دی گئی ہے، نماز جنازہ میں کور کمانڈر راولپنڈی لیفٹیننٹ جنرل ساحر شمشاد مرزا سمیت فوجی حکام نے شرکت کی۔

آئی ایس پی آر کے مطابق شہداء کی میتیں تدفین کے لیے آبائی علاقوں کو روانہ کی جائیں گی، شہداء کی تدفین پورے فوجی اعزاز کے ساتھ کی جائے گی۔