اردو ورلڈ کینیڈا ( ویب نیوز ) وحشی اسرائیل کے مظالم کم نہ ہو سکے ، غزہ کے وسطی علاقوں پر اسرائیل کے جاری حملوں کے نتیجے میں 91 فلسطینی شہید ہوگئے، غزہ پر اسرائیلی فوج کے ایک ہفتے سے جاری حملوں میں اب تک 91 فلسطینی شہید اور 251 زخمی ہو چکے ہیں۔ اسرائیلی فوج نے ایک ہفتے میں 63 مرتبہ فلسطینی پناہ گزین کیمپ نصرت پر حملہ کیا۔اسرائیلی بمباری سے کئی عمارتیں ملبے کا ڈھیر بن گئیں۔

خواتین اور بچوں سمیت درجنوں افراد اب بھی ملبے تلے دبے ہوئے ہیں اور امدادی کارکن ملبے تلے دبے افراد تک پہنچنے میں ناکام ہیں۔ 7 اکتوبر 2023 سے اب تک غزہ پر اسرائیل کے حملوں میں 38 ہزار 983 فلسطینی شہید ہو چکے ہیں جب کہ زخمیوں کی تعداد 89 ہزار سے تجاوز کر چکی ہے۔دوسری جانب اسرائیلی وزیراعظم نیتن یاہو نے اعلان کیا ہے کہ اسرائیلی وفد یرغمالیوں کی رہائی کے لیے مذاکرات دوبارہ شروع کرنے کے لیے جمعرات کو جائے گا تاہم انھوں نے اس بارے میں مزید تفصیلات نہیں بتائیں۔ اسرائیلی وزیراعظم رواں ہفتے امریکہ کا دورہ کریں گے۔