اردو ورلڈ کینیڈا ( ویب نیوز ) برطانیہ کے شہر یارکشائر میں شدید گرمی اور معمول سے کم بارش کے باعث پانی کی سطح خطرناک حد تک کم ہو گئی ہے۔
11 جولائی سے ہوز پائپ (Hosepipe) کے استعمال پر عارضی پابندی عائد کر دی گئی ہے۔یارکشائر واٹر کے مطابق، علاقے کے آبی ذخائر اس وقت صرف 55.8 فیصد پر ہیں، جو کہ سال کے اس وقت کے معمول سے 26.1 فیصد کم ہیں۔ یہ تشویشناک کمی پانی کے سنگین بحران کی طرف اشارہ کرتی ہے۔یارکشائر میں خشک سالی کا اعلانماہ جون میں انگلینڈ کی انوائرمینٹ ایجنسی نے یارکشائر کو خشک سالی کا شکار علاقہ قرار دے دیا تھا، اور آئندہ ہفتوں میں مزید شدید گرمی کی پیشگوئی کی گئی ہے۔
اس صورتحال کے پیش نظر پانی کی بچت اور قدرتی ماحول کے تحفظ کے لیے فوری اقدامات کیے جا رہے ہیں۔یارکشائر واٹر کے ڈائریکٹر آف واٹر، ڈیوی کے (Davy Kay) نے کہا:”ہمیں ابھی کارروائی کرنا ہو گی تاکہ پانی کو بچایا جا سکے اور یارکشائر کے قدرتی ماحول کو محفوظ رکھا جا سکے۔”
پانی کی بچت کے لیے عوام سے تعاون کی اپیل
حکام کے مطابق، پانی کی ترسیل کو متوازن رکھنے کے لیے کوششیں جاری ہیں، لیکن ان کے باوجود پانی کی کمی برقرار ہے۔ اس تناظر میں عوام سے اپیل کی گئی ہے کہ وہ پانی کے ضیاع سے بچیں اور خشک سالی کے اثرات کو کم کرنے میں اپنا کردار ادا کریں۔یارکشائر واٹر کا کہنا ہے کہ چھوٹے چھوٹے اقدامات، جیسے ہوز پائپ کے استعمال سے گریز، باغیچوں کو کم پانی دینا اور غیر ضروری طور پر پانی نہ بہانا، بحران پر قابو پانے میں مددگار ہو سکتے ہیں۔
