اردوورلڈ کینیڈا( ویب نیوز)مونٹریال کا ایک کالج کیوبک حکومت کی جانب سے 3 کروڑ ڈالر کے جرمانے کا سامنا کر رہا ہے کیونکہ اس کے انگریزی زبان کے پروگراموں میں طلباء کی تعداد مقررہ حد سے زیادہ ہے۔

لاسل کالج کا کہنا ہے کہ یہ جرمانے اس 65 سالہ دو لسانی ادارے کے وجود کو خطرے میں ڈال سکتے ہیں۔کیوبک حکومت نے 2022 میں منظور کیے گئے ایک نئے زبان کے قانون کے تحت انگریزی زبان کے کالج پروگراموں میں طلباء کی تعداد پر حد مقرر کی تھی۔
حکومت کا کہنا ہے کہ لاسل کالج واحد نجی سبسڈی یافتہ کالج ہے جس نے ان کوٹوں کی پابندی نہیں کی۔کالج کا مؤقف ہے کہ وہ ان حدود پر اس لیے پورا نہیں اُتر سکا کیونکہ کوٹے نافذ ہونے سے قبل ہی کئی بین الاقوامی طلباء کو داخلہ دیا جا چکا تھا۔
لاسل کالج کا کہنا ہے کہ وہ اس سال خزاں تک ان قواعد پر عملدرآمد کر لے گا، اور اس نے عدالت سے رجوع کر لیا ہے تاکہ ان جرمانوں کو کالعدم قرار دلوایا جا سکے۔