اردوورلڈ کینیڈا( ویب نیوز)لاہور کی انسداد دہشت گردی کی خصوصی عدالت نے 9 مئی 2023 کو لاہور کے شیرپاؤ پل پر جلاؤ گھیراؤ اور پرتشدد کارروائیوں سے متعلق مقدمے کا محفوظ فیصلہ سنا دیا۔ یہ فیصلہ عدالت نے کوٹ لکھپت جیل میں قائم کی گئی خصوصی عدالت میں سنایا۔
جہاں مقدمے کی کارروائی مکمل ہونے کے بعد فیصلہ محفوظ کیا گیا تھا۔انسداد دہشت گردی کی عدالت کے جج ارشد جاوید نے تھانہ سرور روڈ پولیس اسٹیشن میں درج مقدمہ نمبر 97/23 کی سماعت مکمل کی، جو کہ 9 مئی کے ہنگامہ آرائی، املاک کو نقصان پہنچانے اور دہشت گردی کی دفعات کے تحت درج کیا گیا تھا۔
سرکاری وکیل کی حیثیت سے پراسیکیوٹر عبدالجبار ڈوگر نے مقدمے میں ریاست کی نمائندگی کی اور عدالت کے سامنے شواہد اور دلائل پیش کیے۔
دورانِ سماعت، استغاثہ کی جانب سے کل 61 گواہان کی شہادتیں ریکارڈ کی گئیں، جنہوں نے مختلف زاویوں سے مقدمے کے حقائق کو عدالت کے سامنے رکھا اور ملزمان کے خلاف بیانات دیے۔عدالت نے مقدمے میں شامل کل 14 ملزمان کے خلاف ٹرائل مکمل کیا، جن میں سے 8 ملزمان کو جرم ثابت ہونے پر سزا سنائی گئی، جب کہ 6 افراد کو ناکافی شواہد کی بنیاد پر بری کر دیا گیا۔
سزا پانے والوں میں پاکستان تحریک انصاف کی سینئر رہنما ڈاکٹر یاسمین راشد، سابق گورنر پنجاب عمر سرفراز چیمہ، سینیٹر اعجاز چودھری، سابق صوبائی وزیر میاں محمود الرشید، خالد قیوم، ریاض حسین، علی حسن، اور افضال عظیم پاہٹ شامل ہیں۔ عدالت نے ان تمام آٹھ ملزمان کو دس، دس سال قید کی سزا کا حکم سنایا۔دوسری جانب، عدالت نے جن افراد کو مقدمے سے بری قرار دیا اُن میں سابق وزیر خارجہ شاہ محمود قریشی، زباس مان، افتخار احمد، رانا تنویر، حمزہ عظیم پاہٹ اور اعزاز رفیق شامل ہیں۔ عدالت نے ان ملزمان کو شواہد ناکافی ہونے کی بنیاد پر مقدمے سے بری کر دیا۔
واضح رہے کہ لاہور کے تھانہ سرور روڈ میں 9 مئی کو پیش آنے والے پرتشدد واقعات کے بعد پولیس نے جلاؤ گھیراؤ، توڑ پھوڑ، سرکاری املاک کو نقصان پہنچانے اور دہشت گردی کی دفعات کے تحت مقدمہ درج کیا تھا۔ مقدمے کے مطابق، مظاہرین نے شیرپاؤ پل کے علاقے میں شدید توڑ پھوڑ کی، املاک کو نذر آتش کیا، اور امن و امان کی صورتحال کو خراب کیا تھا۔
یہ بھی یاد رہے کہ سپریم کورٹ آف پاکستان نے اس مقدمے سمیت 9 مئی کے تمام واقعات سے متعلق مقدمات کا فیصلہ چار ماہ کے اندر سنانے کی ہدایت جاری کی تھی۔ اس حکم کی روشنی میں انسداد دہشت گردی کی عدالت نے روزانہ کی بنیاد پر مقدمے کی سماعت کی، اور مقررہ وقت کے اندر فیصلہ سنا دیا۔فیصلہ سنائے جانے کے موقع پر تمام ملزمان کو جیل میں ہی قائم عدالت میں پیش کیا گیا تھا، اور عدالت نے ان کی موجودگی میں فیصلہ سنایا۔ اس عدالتی فیصلے کو 9 مئی کے واقعات سے متعلق اہم پیشرفت قرار دیا جا رہا ہے، اور اس کا اثر دیگر جاری مقدمات پر بھی پڑنے کا امکان ہے۔
