اردوورلڈ کینیڈا ( ویب نیوز)وزیراعظم نے خیبرپختونخوا کے ضلع خیبر کی وادی تیراہ میں پرامن مظاہرین اور بے گناہ شہریوں پر فائرنگ کے واقعے پر افسوس کا اظہار کیا ہے۔وزیراعظم ہاؤس کی جانب سے جاری بیان میں کہا گیا ہے کہ باغ میدان کے علاقے میں خوارج کی فائرنگ سے معصوم شہریوں کی شہادت ناقابل برداشت سانحہ ہے۔
وزیراعظم نے ہدایت کی کہ زخمی افراد کو فوری اور مؤثر طبی امداد فراہم کی جائے اور متاثرہ خاندانوں کو ہر ممکن سہولت دی جائے۔انہوں نے دہشتگردوں کی اس کارروائی کی شدید الفاظ میں مذمت کرتے ہوئے کہا کہ معصوم شہریوں کو نشانہ بنانا انسانیت سوز جرم ہے۔وزیراعظم نے واضح کیا کہ دہشتگردی کے مکروہ عزائم قوم کے حوصلے پست نہیں کر سکتے، ریاست دہشتگردوں کا مکمل خاتمہ کر کے دم لے گی۔
واضح رہے کہ وادی تیراہ میں ایک احتجاجی مظاہرے کے دوران خوارج کی فائرنگ سے پانچ افراد جاں بحق اور 17 سے زائد زخمی ہوئے، تاہم واقعے کی تاحال خیبرپختونخوا حکومت نے تصدیق نہیں کی۔دوسری جانب آئی جی ایف سی نارتھ میجر جنرل راؤ عمران سرتاج نے فرنٹیئر کور ٹیچنگ اسپتال میں زخمیوں کی عیادت کی اور ان کی جلد صحت یابی کی دعا کی۔
زخمیوں نے آئی جی ایف سی کو خوارج کی بزدلانہ فائرنگ کی تفصیلات سے آگاہ کیا اور مفت علاج فراہم کرنے پر پاک فوج اور ایف سی نارتھ کا شکریہ ادا کیا۔زخمیوں نے خوارج کے خلاف پاک فوج کے ساتھ مل کر لڑنے کے عزم کو دہراتے ہوئے کہا کہ وہ اپنے علاقے کو امن کا گہوارہ بنانے میں کردار ادا کریں گے۔
