اردو ورلڈ کینیڈا ( ویب نیوز ) امریکی صدر نے مختلف ممالک پر محصولات سے متعلق ایگزیکٹو آرڈر پر دستخط کر دیئے۔
بھارت کے مقابلے میں پاکستان کو رعایت دیتے ہوئے 19 فیصد ٹیرف عائد کر دیا ،امریکہ نے کینیڈا پر ٹیرف 25 فیصد سے بڑھا کر 35 فیصد کر دیا، انڈیا پر 25 فیصد ٹیرف، بنگلہ دیش پر 20 فیصد ٹیرف اور ترکی اور اسرائیل پر 15 فیصد ٹیرف لگا دیا۔
وائٹ ہاؤس کے ترجمان کے مطابق جنوبی افریقہ پر 30 فیصد، ویتنام پر 20 فیصد، وینزویلا پر 15 فیصد، سوئٹزرلینڈ پر 39 فیصد، عراق پر 35 فیصد، جاپان پر 15 فیصد، لیبیا پر 30 فیصد اور میانمار پر 40 فیصد ٹیرف عائد کیا گیا ہے۔ نئے نرخوں کا اطلاق آج سے ہوگا۔امریکی صدر ڈونلڈ ٹرمپ کا کہنا ہے کہ محصولات تجارتی مذاکرات، باہمی مشاورت، سفارشات اور معلومات کی بنیاد پر لگائے گئے۔سینئر امریکی حکام کا کہنا ہے کہ چین کے ساتھ ٹیرف پر کوئی حتمی فیصلہ نہیں ہوا، بھارت سے اختلافات راتوں رات حل نہیں ہوسکتے، برکس اور روس پر بھارت کے ساتھ جیو پولیٹیکل اختلافات بھی شامل ہیں۔یاد رہے کہ گزشتہ روز پاکستان اور امریکا کے درمیان تجارتی معاہدے پر کامیابی سے دستخط ہوئے تھے۔ اس معاہدے کا اعلان امریکی صدر ڈونلڈ ٹرمپ نے ٹوئٹر پر اپنی پوسٹ کے ذریعے کیا۔ معاہدے کا مقصد دو طرفہ تجارت کو فروغ دینا، مارکیٹ تک رسائی میں اضافہ، سرمایہ کاری کو راغب کرنا اور باہمی دلچسپی کے شعبوں میں تعاون کو فروغ دینا ہے۔
