اردوورلڈ کینیڈا( ویب نیوز)اونٹاریو کے سب سے بڑے اسپتال منصوبے سے متعلق ایک اہم تعمیراتی معاہدے پر سوالات اٹھائے جا رہے ہیں، کیونکہ ایک امریکی ملکیتی کمپنی کو 140 ملین ڈالر کا ٹھیکہ دے دیا گیا ہے۔
یہ معاملہ ٹریلیم ہیلتھ پارٹنرز کے نئے اسپتال پیٹر گلگن مسیساگا ہسپتال سے متعلق ہے، جو 2.8 ملین اسکوائر فٹ پر مشتمل ہوگا اور کینیڈین تاریخ کے سب سے بڑے صحت عامہ کے بنیادی ڈھانچے کے منصوبوں میں شمار کیا جا رہا ہے۔ یہ نیا اسپتال موجودہ اسپتال سے تین گنا بڑا ہوگا، جس میں 22 منزلہ مریضوں کی دیکھ بھال کا ٹاور، 350 سے زائد بستروں کی گنجائش، 9 نئے اور 14 جدید آپریٹنگ رومز، بڑا نوزائیدہ بچوں کی نگہداشت یونٹ (NICU)، اور صوبے کے سب سے بڑے ایمرجنسی ڈیپارٹمنٹس میں سے ایک شامل ہوگا۔
اونٹاریو گلاس اینڈ میٹل ایسوسی ایشن کا کہنا ہے کہ اس منصوبے سے جڑا ایک معاہدہ صوبے کے لیے مہنگی غلطی ثابت ہو سکتا ہے۔
ایسوسی ایشن نے پریمیئر ڈَگ فورڈ کو ایک خط لکھا ہے، جس میں کہا گیا ہے کہ 140 ملین ڈالر مالیت کا ایک اہم فَساڈ (عمارت کے بیرونی حصے کا) معاہدہ ایک امریکی ملکیتی کمپنی کو دیا گیا ہے، جو مبینہ طور پر یہ کام میکسیکو میں آؤٹ سورس کر رہی ہے۔ ایسوسی ایشن کا مؤقف ہے کہ یہ معاہدہ کسی اونٹاریو کی کمپنی کو دیا جانا چاہیے تھا تاکہ مقامی روزگار، ٹیکس آمدن اور معیشت کو سہارا ملے — خاص طور پر ایسے وقت میں جب معاشی غیر یقینی صورتحال بڑھ رہی ہے۔
ایسوسی ایشن کے صدر بلیک سینڈرز نے کہا’امریکی مصنوعات پر حالیہ 35 فیصد ٹیرف کے بعد اس طرح کا فیصلہ بہت ہی ناقص وقت پر کیا گیا ہے۔
انہوں نے مزید کہاامریکہ میں جب کسی منصوبے پر سرکاری فنڈ خرچ ہوتا ہے تو اس پر ‘Build America Buy America’ (BABA) کی شرط لاگو ہوتی ہے۔ تو پھر ہمارے یہاں ایسا کیوں نہیں؟ ہمیں بھی ‘کینیڈا کو ترجیح’ دینے والی پالیسی اپنانی چاہیے۔‘
اونٹاریو کی این ڈی پی (اپوزیشن جماعت) نے اپنے بیان میں کہا:یہ ناقابل قبول ہے کہ 140 ملین ڈالر کا ٹیکس دہندگان کا پیسہ ایک امریکی کمپنی کو دیا جائے، جبکہ ہمیں اپنے شہریوں کے لیے روزگار پیدا کرنے کی ضرورت ہے۔ پبلک فنڈز کو مقامی معیشت اور مزدوروں کی حمایت کے لیے استعمال ہونا چاہیے۔‘‘
اونٹاریو لبرل پارٹی کی لیڈر بونی کرومبی نے بھی ڈَگ فورڈ حکومت پر تنقید کی اور کہا:’یہ وہ قسم کا معاہدہ ہے جو کینیڈین ملازمتیں پیدا کرے، کینیڈین اجرتیں ادا کرے، اور ہماری مقامی سپلائی چین کو مضبوط کرے۔ ہم اس وقت ایک تجارتی جنگ کے بیچ میں ہیں، اور اب وقت ہے کہ ہم مقامی طور پر تعمیر کریں اور مقامی اشیاء خریدیں۔
یہ تنازع ایسے وقت سامنے آیا ہے جب وزیر اعلیٰ فورڈ نے ایلون مسک کی کمپنی SpaceX کے ساتھ 100 ملین ڈالر کے Starlink انٹرنیٹ معاہدے کو منسوخ کرنے کا بھی اعلان کیا ہے، جس سے حکومت کی درآمدی اور مقامی ترجیحی پالیسیوں پر مزید سوالات اٹھ رہے ہیں۔
