اردوورلڈ کینیڈا( ویب نیوز)بلوچستان کے ضلع مستونگ میں فتنہ الہند کے حمایت یافتہ دہشت گردوں نے سیکیورٹی فورسز کی گاڑی کو بارودی مواد سے نشانہ بنایا، جس کے نتیجے میں پاک فوج کے تین جوان مادرِ وطن پر قربان ہو گئے، جبکہ جوابی کارروائی میں چار دہشت گردوں کو جہنم واصل کر دیا گیا۔
پاک فوج کے شعبۂ تعلقات عامہ (آئی ایس پی آر) کے مطابق حملہ 5 اور 6 اگست کی درمیانی شب کیا گیا۔ بارودی حملے اور بعد ازاں شدید فائرنگ کے تبادلے میں میجر محمد رضوان طاہر، نائیک ابنِ امین اور لانس نائیک محمد یونس نے جام شہادت نوش کیا۔
آئی ایس پی آر کے مطابق شہید میجر رضوان طاہر کا تعلق نارووال سے تھا، اور وہ دہشت گردی کے خلاف کئی اہم کارروائیوں میں صفِ اول میں شریک رہے۔ انہوں نے ہمیشہ اپنی ٹیم کو فرنٹ لائن سے قیادت فراہم کی۔
آئی ایس پی آر کے مطابق جوابی کارروائی میں چار دہشت گرد مارے گئے، جبکہ علاقے میں سینی ٹائزیشن آپریشن تاحال جاری ہے تاکہ کسی بھی باقی ماندہ دہشت گرد کو کیفرِ کردار تک پہنچایا جا سکے۔
فوجی ترجمان کا کہنا ہے کہ سیکیورٹی فورسز ملک کو بھارتی سرپرستی میں ہونے والی دہشت گردی سے پاک کرنے کے لیے پرعزم ہیں، اور ہمارے بہادر سپاہیوں کی قربانیاں قوم کے حوصلے اور عزم کو مزید مضبوط کرتی ہیں۔
