اردوورلڈ کینیڈا( ویب نیوز)قومی اسمبلی میں بیوی کو گھر سے بے دخل کرنے پر قید اور جرمانے کی سزا سے متعلق مجوزہ بل پیش کر دیا گیا۔

 تصیلات  کے مطابق، پاکستان پیپلز پارٹی کی رکن قومی اسمبلی شرمیلا فاروقی نے یہ بل پیش کیا، جس میں تعزیراتِ پاکستان میں سیکشن 298ڈی کے تحت نئی شق شامل کرنے کی سفارش کی گئی ہے۔

مجوزہ قانون کے مطابق، شوہر یا خاندان کا کوئی بھی فرد اگر غیر منصفانہ طور پر خاتون کو گھر سے نکالے گا تو یہ قابل سزا جرم تصور ہوگا۔ اس جرم پر 3 سے 6 ماہ تک قید کی سزا دی جا سکے گی، جبکہ 2 لاکھ روپے تک جرمانہ بھی عائد کیا جا سکتا ہے۔

خاتون کو گھر سے بے دخل کرنے سے متعلق مقدمات کی سماعت فرسٹ کلاس مجسٹریٹ کرے گا۔ اس ترمیمی مسودے کو فوجداری قانون ترمیمی بل 2025 کا نام دیا گیا ہے۔ ڈپٹی اسپیکر نے بل کو مزید جانچ اور سفارشات کے لیے متعلقہ کمیٹی کے سپرد کر دیا۔