اردو ورلڈ کینیڈا ( ویب نیوز ) پاکستان ہائی کمیشن، کینیڈا میں پاکستان کی 79ویں یومِ آزادی کے موقع پر ایک شاندار اور پروقار تقریب کا انعقاد کیا گیا
تقریب میں پاکستانی کمیونٹی کے اراکین، طلبہ، مختلف شعبہ ہائے زندگی سے تعلق رکھنے والے افراد اور کینیڈین مہمانوں نے بڑی تعداد میں شرکت کی۔تقریب کا آغاز تلاوتِ کلامِ پاک سے ہوا، جس کے بعد قومی ترانہ پیش کیا گیا۔ اس موقع پر پاکستان کے صدر اور وزیرِاعظم کے خصوصی پیغامات پڑھ کر سنائے گئے جن میں یومِ آزادی کی تاریخی اہمیت، قربانیوں کی یاد اور ملک کے ترقی کے سفر کو آگے بڑھانے کے عزم پر زور دیا گیا۔ہائی کمشنر نے اپنے خطاب میں کہا کہ یومِ آزادی محض ایک جشن نہیں بلکہ یہ قربانی، اتحاد اور محنت کا پیغام ہے۔ انہوں نے کہا کہ بیرونِ ملک مقیم پاکستانی اپنے کردار، محنت اور دیانت داری سے وطن کا مثبت تشخص اجاگر کر رہے ہیں اور یہ سلسلہ جاری رہنا چاہیے۔تقریب میں پاکستانی ثقافت کو اجاگر کرنے کے لیے روایتی موسیقی، ملی نغمے، اور فوک رقص پیش کیے گئے۔ پاکستانی روایتی کھانوں کے اسٹالز لگائے گئے جن سے مہمانوں کی تواضع کی گئی۔ بچوں اور نوجوانوں کے لیے خصوصی سرگرمیوں کا بھی اہتمام کیا گیا جن میں ملی ترانے گانے کا مقابلہ، پینٹنگ اور فیس پینٹنگ شامل تھیں۔
ہائی کمشنر نے اس موقع پر مختلف شعبوں میں نمایاں خدمات انجام دینے والے پاکستانیوں کو تعریفی اسناد بھی پیش کیں۔ انہوں نے کہا کہ کینیڈا میں پاکستانی کمیونٹی پاکستان کی پہچان ہے اور اس کی کامیابیاں پاکستان کے لیے فخر کا باعث ہیں۔تقریب میں فوٹو نمائش کا بھی اہتمام کیا گیا جس میں پاکستان کے قدرتی مناظر، تاریخی مقامات، اور ثقافتی ورثے کی تصاویر شامل تھیں۔ شرکاء نے ان تصاویر میں پاکستان کے خوبصورت اور مثبت پہلوؤں کو سراہا۔تقریب کا اختتام پاکستان کی سلامتی اور خوشحالی کے لیے دعا پر ہوا، اور شرکاء نے یومِ آزادی کے موقع پر ایک دوسرے کو مبارکباد پیش کی۔
