اردو ورلڈ کینیڈا ( ویب نیوز کینیڈا کے شہر کیلگری میں گزشتہ ماہ پیش آنے والے چاقو زنی اور ڈکیتی کے واقعے میں شدید زخمی ہونے والا شخص بالآخر اپنے زخموں کی تاب نہ لاتے ہوئے چل بسا۔
پولیس کے مطابق یہ واقعہ 24 جولائی کی رات ڈرماٹ بالڈون وے ایس ای پر واقع کیلگری ڈراپ اِن سینٹر کے باہر پیش آیا۔پولیس اور ریسکیو اہلکاروں کو شام تقریباً 8 بج کر 40 منٹ پر واقعے کی اطلاع ملی۔ جائے وقوعہ پر پہنچنے پر انہوں نے ایک شخص کو شدید زخمی حالت میں پایا جسے فوری طور پر تشویشناک حالت میں اسپتال منتقل کیا گیا۔ بدھ کے روز پولیس نے تصدیق کی کہ وہ شخص زخموں کی تاب نہ لاتے ہوئے زندگی کی بازی ہار گیا ، شناخت 37 سالہ گر دیپ سنگھ منڈی کے نام سے ہوئی ہے، جس کی تصدیق جمعرات کو ہونے والی پوسٹ مارٹم رپورٹ کے بعد کی گئی۔پولیس کے مطابق واقعے کے روز ہی دو مشتبہ افراد کو گرفتار کر لیا گیا تھا، جن پر ابتدائی طور پر حملہ (اسالٹ) اور ڈکیتی کے الزامات عائد کیے گئے تھے۔
اب تک پولیس نے دونوں ملزمان کے خلاف نئے الزامات عائد کرنے کے حوالے سے کوئی تفصیل جاری نہیں کی۔تحقیقات جاری ہیں اور پولیس نے کسی بھی عینی شاہد یا اس واقعے کے وقت کی سیکیورٹی فوٹیج رکھنے والے افراد سے اپیل کی ہے کہ وہ پولیس ہیلپ لائن **403-266-1234** پر رابطہ کریں، یا اپنی اطلاع گمنام طور پر کرائم اسٹاپرز کے ذریعے فراہم کریں۔پولیس کا کہنا ہے کہ یہ افسوسناک واقعہ نہ صرف تشدد کے بڑھتے ہوئے خطرات کو ظاہر کرتا ہے بلکہ ڈاؤن ٹاؤن کیلگری کے عوامی مقامات کی سیکیورٹی کے حوالے سے بھی سوالات اٹھاتا ہے۔
