اردو ورلڈ کینیڈا ( ویب نیوز )کینیڈا کے وزیرِاعظم مارک کارنی نے ہفتے کے روز ایک غیرمعمولی بیان جاری کرتے ہوئے امریکی صدر ڈونلڈ ٹرمپ کی روس یوکرین تنازع کے خاتمے کی کوششوں پر تعریف کی ہے۔
کارنی نے اپنے بیان میں کہا کہ”صدر ٹرمپ اور امریکا کی قیادت روس کی غیرقانونی جنگ کے خاتمے کے لیے ایک موقع فراہم کر رہی ہے۔”انہوں نے مزید کہا کہ "ایک منصفانہ اور پائیدار امن کے لیے مضبوط اور قابلِ اعتماد سکیورٹی ضمانتیں ناگزیر ہیں۔ میں امریکا کی جانب سے ان ضمانتوں کی فراہمی کے امکان کا خیرمقدم کرتا ہوں، جو ’کولیشن آف دی ولنگ‘ کی کاوشوں کا حصہ ہیں۔”
وزیرِاعظم نے واضح کیا کہ کینیڈا صدر ولودیمیر زیلنسکی اور اتحادی ممالک کے ساتھ قریبی رابطے میں ہے تاکہ یوکرین کی سلامتی اور امن کے لیے حمایت کو مزید مستحکم بنایا جا سکے۔یہ بیان ایسے وقت میں سامنے آیا جب صدر ٹرمپ نے الاسکا میں روسی صدر ولادیمیر پیوٹن سے ملاقات کی، جس پر عالمی ماہرینِ خارجہ نے تنقید کرتے ہوئے کہا کہ اس اجلاس نے کوئی قابلِ ذکر پیش رفت تو نہ دی لیکن پیوٹن کی عالمی شبیہ کو ضرور تقویت دی۔دوسری جانب، وزیرِاعظم کارنی کے دو وفاقی وزراء پیر کے روز اسٹاک ہوم (سویڈن) میں اہم نجی اجلاسوں میں شریک ہوں گے۔ ان ملاقاتوں میں کینیڈا اور سویڈن کے درمیان دفاعی تعاون اور تجارتی تعلقات کو وسعت دینے پر گفتگو متوقع ہے۔
