اردو ورلڈ کینیڈا ( ویب نیوز ) فلسطینی عوام پر اسرائیلی فوج کے حالیہ حملوں اور بڑھتے مظالم کے خلاف دنیا کے مختلف ممالک میں احتجاجی مظاہرے
مظاہروں میں برطانیہ، فن لینڈ، سویڈن اور اسرائیل کے شہریوں نے بڑی تعداد میں شرکت کی۔ مظاہرین نے فلسطینی عوام کے ساتھ اظہارِ یکجہتی کرتے ہوئے اسرائیل کے خلاف شدید نعرے بازی کی اور فوری جنگ بندی کا مطالبہ کیا۔برطانیہ میں رائل ایئر فورس کے ایک اڈے کے باہر سینکڑوں افراد جمع ہوئے اور برطانوی حکومت پر زور دیا کہ وہ اسرائیل کو ہتھیاروں کی فراہمی بند کرے۔ فن لینڈ میں فلسطینی حامیوں نے اسلحہ ساز کمپنی کے دفتر کے سامنے احتجاج کیا اور کھڑکیوں پر سرخ پینٹ پھینک کر اسرائیل کو ہتھیاروں کی ترسیل کے خلاف علامتی کارروائی کی۔
سویڈن میں سینکڑوں افراد نے غزہ میں اسرائیلی حملوں کے دوران شہید ہونے والے فلسطینی صحافیوں کی یاد میں مارچ کیا۔ اس دوران مظاہرین نے نسل کشی بند کرنے اور فوری جنگ بندی کے حق میں بینرز اٹھا رکھے تھے۔دوسری جانب اسرائیل کے اندر بھی ہزاروں افراد اپنی ہی حکومت کے خلاف سڑکوں پر نکل آئے۔ تل ابیب میں مظاہرین نے فوجی ہیڈکوارٹر کے باہر احتجاج کرتے ہوئے حکومت سے مطالبہ کیا کہ وہ حماس کے ساتھ مذاکرات کرے اور یرغمالیوں کی رہائی کے لیے فوری معاہدہ کرے۔
