اردوورلڈ کینیڈا( ویب نیوز)سینیئر سیاست دان جاوید ہاشمی نے کہا ہے کہ وہ خود بھی اڈیالہ جیل کی سختیاں بھگت چکے ہیں لیکن جس انداز میں پاکستان تحریک انصاف (پی ٹی آئی) کے بانی چیئرمین عمران خان نے قید کاٹی ہے، اس کی وہ توقع نہیں کر سکتے تھے۔
اڈیالہ روڈ کے داہگل ناکے پر میڈیا سے گفتگو میں جاوید ہاشمی کا کہنا تھا کہ عمران خان آج بھی آزادی کی جنگ لڑ رہے ہیں، حالانکہ ایسی پابندیاں تو بادشاہت کے ادوار میں بھی دیکھنے کو ملتی تھیں۔
انہوں نے مزید کہا کہ ملک کی سیاسی صورت حال سب کے سامنے ہے، یہاں سیاست کو ختم کرنے کی منظم کوشش کی جا رہی ہے۔ ان کے مطابق جو افراد آئین اور جمہوریت کے تحفظ کی جدوجہد میں مصروف ہیں وہ دراصل ایک جہاد کر رہے ہیں۔ جاوید ہاشمی نے شکوہ کیا کہ ملک میں نہ صرف سیاست اور قانون کو کمزور کیا جا رہا ہے بلکہ عدلیہ کی آزادی بھی ختم ہو چکی ہے۔
جاوید ہاشمی نے انکشاف کیا کہ ماضی میں عمران خان کو یہ یقین دہانی کرائی گئی تھی کہ چار حلقے کھولے جائیں گے اور پھر انتخابات ہوں گے۔ انہوں نے بتایا کہ اُس وقت انہوں نے بانی پی ٹی آئی کو سمجھایا تھا کہ اسمبلی پر دھاوا بولنے کے حق میں نہیں ہوں اور اس طرزِ عمل سے عوام سے دوری پیدا ہوگی۔
سینیئر رہنما کا کہنا تھا کہ عمران خان اب ان کی اُس بات کو سمجھنے لگے ہیں، اسی لیے بار بار یہ عزم دہرا رہے ہیں کہ وہ آخری سانس تک جدوجہد جاری رکھیں گے۔ جاوید ہاشمی نے مزید کہا کہ 9 مئی کے واقعات عمران خان نے نہیں کیے، اگر حقائق جاننا چاہتے ہیں تو اس پر عدالتی کمیشن قائم کیا جانا چاہیے۔
