یہ ایونٹ آج سے 30 سال پہلے ایک چھوٹے سے کامک کنونشن کے طور پر شروع ہوا تھا، جہاں صرف 1500 کے قریب شائقین شریک ہوئے تھے۔ آج یہ شمالی امریکا کا تیسرا سب سے بڑا پاپ کلچر ایونٹ بن چکا ہے، جو دنیا بھر سے مداحوں کو اپنی طرف کھینچتا ہے۔

فین ایکسپو کے نائب صدر اینڈریو موئیس کے مطابق ہم دیکھ رہے ہیں کہ تقریباً ایک لاکھ تیس ہزار لوگ اس ایونٹ میں شریک ہوں گے۔ پہلے یہ صرف ایک محدود حلقے تک تھا، لیکن اب ہر کوئی فینڈم کو انجوائے کرنا پسند کرتا ہے۔ اس لیے یہاں سب کے لیے کچھ نہ کچھ ہے۔

اس ایونٹ میں فین کلچر کی ہر جھلک نظر آتی ہے—کامکس، سائنس فکشن، سپر ہیروز، اینی می، گیمنگ اور کاس پلے۔

شرکاء کے مطابق یہ ایک ایسا مقام ہے جہاں لوگ بلا جھجک اپنی شناخت کے ساتھ شامل ہوتے ہیں اور سب کا خیر مقدم کیا جاتا ہے۔

اس سال کے پروگرام میں کئی خاص تقریبات شامل ہیں، جن میں "بیک ٹو دی فیوچر” فلم کی 40ویں سالگرہ کے موقع پر مائیکل جے فاکس اور کرسٹوفر لائیڈ کی ری یونین بھی شامل ہے۔

ڈزنی، لیگو، دی سمپسنز اور اسٹار وارز جیسے بڑے برانڈز اور فرنچائزز بھی اس میں موجود ہیں۔

مقامی کاروبار بھی اس ایونٹ سے فائدہ اٹھاتے ہیں۔ مانٹریال کے میجر کامکس کے مالک آسکر یازدیجیان، جو 1998 سے اس ایکسپو کا حصہ ہیں، کہتے ہیں کہ فین ایکسپو سال کا سب سے زیادہ منافع بخش وقت ہوتا ہے۔
"اگر آپ کا بزنس ہے، آپ اس انڈسٹری میں ہیں یا یہ آپ کا شوق ہے تو آپ کو یہاں ہونا چاہیے۔ یہاں آپ کلکشن خرید سکتے ہیں، نئے دوست اور رابطے بنا سکتے ہیں، یہ واقعی زبردست ایونٹ ہے۔موئیس کا کہنا ہے کہ فین ایکسپو مقامی معیشت کو بھی سہارا دیتا ہے۔
ریسٹورنٹس، ہوٹلز اور میٹرو ٹورنٹو کنونشن سینٹر اس ایونٹ سے نمایاں فائدہ اٹھاتے ہیں۔

فین ایکسپو 21 اگست سے 24 اگست تک میٹرو ٹورنٹو کنونشن سینٹر میں جاری رہے گا۔