اردوورلڈکینیڈا( ویب نیوز)خیبر پختونخوا کے وزیراعلیٰ علی امین گنڈا پور کے بھائی اور رکن قومی اسمبلی فیصل امین گنڈا پور نے قومی اسمبلی کی تین قائمہ کمیٹیوں کی رکنیت چھوڑ دی۔

اس حوالے سے انہوں نے اسپیکر قومی اسمبلی کو ایک خط ارسال کیا ہے جس میں وضاحت کی گئی ہے کہ یہ فیصلہ پاکستان تحریک انصاف کے بانی عمران خان کی ہدایت پر کیا گیا ہے۔

خیال رہے کہ ایک روز قبل عمران خان نے اپنی جماعت کو ہدایت دی تھی کہ وہ قومی اسمبلی کی تمام قائمہ کمیٹیوں سے الگ ہو جائیں اور ضمنی انتخابات کے عمل کا بھی حصہ نہ بنیں۔

اڈیالہ جیل کے باہر گفتگو کرتے ہوئے علیمہ خان نے بھی تصدیق کی تھی کہ عمران خان نے پارٹی کو کمیٹیوں سے استعفے دینے کا حکم دیا ہے۔ ان کا مزید کہنا تھا کہ چیئرمین پی ٹی آئی نے بیرسٹر گوہر اور سلمان اکرم راجا کو خصوصی ہدایات دیتے ہوئے واضح کیا ہے کہ ضمنی انتخابات میں شرکت کر کے ان کو قانونی حیثیت نہیں دینی چاہیے۔