اردوورلڈ کینیڈا( ویب نیوز)وزیراعظم شہباز شریف نے کہا ہے کہ پاکستان امن کا خواہاں ملک ہے اور اپنے تمام ہمسایہ ممالک کے ساتھ مستحکم تعلقات کا خواہاں ہے، لیکن انتہا پسندی اور دہشت گردی خطے کے امن کے لیے خطرہ ہیں۔
شہباز شریف نے شنگھائی تعاون تنظیم کے سربراہ اجلاس میں خطاب کرتے ہوئے چین کی شاندار میزبانی اور بہترین انتظامات پر صدر اور حکومت چین کا شکریہ ادا کیا۔ انہوں نے ازبکستان اور کرغزستان کو ان کے یومِ آزادی کی مبارکباد بھی دی۔ انہوں نے کہا کہ شنگھائی تعاون تنظیم میں پاکستان کی شرکت علاقائی تعاون اور یکجہتی کے فروغ کے عزم کی عکاسی کرتی ہے۔
وزیراعظم نے کہا کہ چین کی کامیابیاں صدر شی جن پنگ کی بصیرت اور قیادت کا نتیجہ ہیں، اور چین کی عالمی قیادت شنگھائی تعاون تنظیم کے علاوہ دیگر اہم اقدامات میں بھی ظاہر ہوتی ہے۔ پاکستان ہمیشہ کثیر الجہتی تعاون، مکالمے اور سفارت کاری پر یقین رکھتا ہے۔ ہر ملک کے لیے خودمختاری اور علاقائی سالمیت سب سے اہم ہیں، اور پاکستان ایس سی او کے ارکان اور ہمسایہ ممالک کی خودمختاری و علاقائی سالمیت کا احترام کرتا ہے اور تمام بین الاقوامی و دوطرفہ معاہدوں کا پابند ہے۔
انہوں نے کہا کہ پاک-چین اقتصادی راہداری (سی پیک) دونوں ممالک کے درمیان اہم منصوبہ ہے۔ پاکستان اقوامِ متحدہ اور ایس سی او کے چارٹرز کی پابندی کرتا ہے اور یہ سلسلہ جاری رکھے گا۔ ایران پر اسرائیل کے بلاجواز حملے کی شدید مذمت کی گئی اور غزہ میں جاری ظلم و بھوک کو انسانی ضمیر پر گہرے زخم کے طور پر دیکھا جاتا ہے۔ پاکستان اقوامِ متحدہ کے منظور شدہ دو ریاستی حل کی مکمل حمایت کرتا ہے۔
وزیراعظم نے کہا کہ بلوچستان اور خیبر پختونخوا میں دہشت گرد حملوں میں بیرونی مداخلت کے ثبوت موجود ہیں اور ان جرائم کے مرتکب افراد اور سہولت کاروں کو جواب دہ ہونا ہوگا۔ پاکستان نے دہشت گردی کے خلاف جنگ میں بے پناہ قربانیاں دی ہیں اور یہ سلسلہ ملک کی سلامتی کے لیے جاری رہے گا۔
