اردوورلڈ کینیڈا( ویب نیوز)وزیراعظم پاکستان شہباز شریف نے بیجنگ میں چینی صدر شی جن پنگ سے ملاقات کی اور دونوں رہنماؤں نے علاقائی صورتحال، اقتصادی تعلقات اور دوطرفہ تعاون کے امور پر تفصیلی بات چیت کی۔ ملاقات میں وفاقی وزرا اور دیگر اعلیٰ حکام بھی موجود تھے۔
وزیراعظم نے کہا کہ چین جنوبی ایشیا میں جامع مذاکرات کی نگرانی کرے تاکہ مذاکرات کے مثبت نتائج پاکستان تک پہنچ سکیں۔ انہوں نے بلوچستان اور خیبرپختونخوا میں دہشت گردی میں بیرونی عناصر کی مداخلت کی نشاندہی کرتے ہوئے کہا کہ اس بارے میں عالمی بیانیہ درست نہیں ہے۔
شہباز شریف نے چینی صدر کے ساتھ چین-پاکستان اقتصادی راہداری (CPEC) کی اہمیت پر بھی تبادلہ خیال کیا اور کہا کہ سی پیک نے پاکستان میں توانائی اور بنیادی ڈھانچے کی ترقی میں نمایاں کردار ادا کیا ہے۔ انہوں نے کہا کہ سی پیک کے فیز 2 میں اسمارٹ سٹیز، زرعی صنعت اور نیکسٹ جنریشن ٹیکنالوجی پر خصوصی توجہ دی جائے گی۔
وزیراعظم نے کہا کہ پاکستان اور چین کی دوستی دنیا بھر میں ایک منفرد مقام رکھتی ہے اور دونوں ممالک ہر مشکل میں ایک دوسرے کے ساتھ کھڑے ہیں۔ انہوں نے تیانجن-بنہائی نیو ایریا کی ترقی دیکھ کر خوشی کا اظہار کیا اور پاکستان اور تیانجن کے درمیان تجارتی تعلقات بڑھانے کی خواہش کا اعادہ کیا۔
شہباز شریف نے کہا کہ پاکستان کے کراچی، بن قاسم اور گوادر پورٹس اور چین کے تیانجن پورٹ کے درمیان تعاون کو بڑھانا چاہتے ہیں اور پورٹ ہینڈلنگ اور آپریشنز کے شعبے میں چینی مہارت سے فائدہ اٹھانا چاہتے ہیں۔ انہوں نے پاکستانی خصوصی اقتصادی زونز میں چینی کمپنیوں کو سرمایہ کاری کی دعوت دی اور فارماسیوٹیکل، بائیو میڈیسن اور ویکسین کے شعبے میں تعاون بڑھانے پر زور دیا۔
وزیراعظم نے بتایا کہ حکومت نے پچھلے ڈیڑھ سال میں معاشی اصلاحات میں اہم سنگ میل عبور کیے ہیں، جن میں فیڈرل بورڈ آف ریونیو کی ڈیجیٹائزیشن، نئی قومی اقتصادی پالیسی اور آئی ٹی اقدامات شامل ہیں۔
ملاقات میں وزیراعظم کو تیانجن-بنہائی نیو ایریا کے صنعتی اور اقتصادی شعبوں کے حوالے سے بریفنگ دی گئی، جس میں انٹیلی جینٹ ٹیکنالوجی، گرین پیٹرو کیمیکل، آٹو موٹو، بائیو میڈیسن، نیو انرجی، ایرو اسپیس، کولڈ چین اسٹوریج، ڈیپ-سی مائننگ، جین تھراپی اور دیگر شعبے شامل ہیں۔ دونوں ممالک کے درمیان کھاد، فارماسیوٹیکل، ٹائرز، معدنیات اور مچھلی کی تجارت بھی جاری ہے۔
وزیراعظم نے تیانجن-بنہائی نیو ایریا کے کاروباری افراد اور صنعتوں کو پاکستان میں سرمایہ کاری اور تجارتی روابط بڑھانے کی دعوت دی۔
