اردوورلڈ کینیڈا( ویب نیوز)وینکوور پولیس کے مطابق مشرقی وینکوور کے جوائس۔کولنگ ووڈ علاقے میں جمعہ کے روز ہونے والے ایک چاقو حملے اور  دوہرے  قتل کے سلسلے میں ایک مشتبہ شخص کو گرفتار کر لیا گیا ہے۔

پولیس کا کہنا ہے کہ انہیں دوپہر 2 بجے سے کچھ پہلے وینیس ایونیو اور اسپینسر اسٹریٹ کے قریب ایک رہائشی عمارت میں چاقو حملے کی اطلاع ملی۔ موقع پر پہنچنے پر پولیس کو 50 سالہ خاتون ملی جو شدید زخمی تھیں اور ان کی حالت نازک بتائی گئی۔

بعد ازاں پولیس نے جوائس اسٹریٹ اور وینیس ایونیو کے قریب ایک اور عمارت سے دو خواتین کی لاشیں برآمد کیں۔ پولیس کا کہنا ہے کہ یہ دونوں قتل اور چاقو حملہ آپس میں منسلک ہیں۔

پولیس کے مطابق 54 سالہ مشتبہ شخص کو جائے وقوعہ سے معمولی زخموں کے ساتھ حراست میں لیا گیا ہے۔ تاحال اس پر کوئی الزام عائد نہیں کیا گیا۔

ہلاک ہونے والی دونوں خواتین کی شناخت ابھی تک ظاہر نہیں کی گئی۔پولیس نے عوام سے اپیل کی ہے کہ اگر کسی کے پاس اس واقعے سے متعلق معلومات ہوں تو وہ وینکوور پولیس ہومیسائیڈ یونٹ سے رابطہ کرے۔